Mopungchuket yimdak single-use plastic carry bag mamshitsü

Mokokchung, April 30 (TYO): Plastic-free yim ka kümdaktsütsü nükjidong yur Mopungchuket yimdak May 1, 2019 nungi tenzüka single-use plastic carry bags (polythene mica) mamshidaktsütsü telemtetba agiogo, ta Aotemolung Medemsanger Putu Menden Mopungchuket-i sangdong ka ajanga metetdaktsü.
Plastic-free yim ka kümdaktsütsü nükjidong alinung, Mopungchuket yim semdangertemi aser yim ajangdanga jajartemi ibaji akhümtsübua tashi angadaktsünür, ta parnokisa mepishia metetdaktsü.
“Compliant of Solid Waste Management Rules 2016” nung keta aliba ama mapa ajak shitak inyakba ngua Mopungchuket model yim ka asütsü shimtetba asoshi Putu mendenisa Nagaland sorkar dang pelaba lemsatep.
Angazükba agi, Mopungchuket nung plastic shibangtsüba mapatong ya küm trok (6) dak tali agir ang tang mapa akümer. Single-use plastic bags shibangtsü onük ya 2013 küm Mopungchuket Community Tourism Society-i ayongba shisatokden sentong ka nung mezüng jembitepa shisatet. Iba sülenji 2017 küm Mopungchuket Baptist Arogo Youth Ministry-i parnok centenary nüngtem nung “Plastic Free Mopungchuket Project” ta sür mapatong ka tenzük aser iba sülen parnokisa Village Council aser Greensight Project nungi teyari agia iba dak sentakba nung awareness sentong balala agia aruba osang angazüker.
Aji oda, March 10, 2019 nü Aotemolung Medemsanger Putu Menden-i merükmejuba onük dak sentakba nung lokti senden ka ayonga liasü, iba senden nungji Youth Ministry-ia single-use plastic carry bags shibangtsü atema onük ka benoka jembitep. Inüji yimer ajaki mulunga iba onükji agizüka May 2019 nungi mapa küma aotsü lemtet, ta osang ajanga angazüker.