Saringyim nung Border Peace senden amen

Dimapur, April 30 (Agencies): Assam den arrtsüa aliba Saringyim yimtsüng nung tanü peace coordination senden ka ayonga amen.
Saringyim ya Mokokchung district kübok lir aser EAC Longchem Athrong-i acha-ayanga Assam aser Nagaland tsüngda iba senden amen.
August 2, 2019 nü Assam-Nagaland arrtsü anasa alirtem Tsüngremmong benjung külemi amungtsü atema EAC Athrong-i sentong atongba atema pelar ta tanü senden nung adenertemi ashi.
Saringyim village council-i par yimtsüng nung Trans-Border Cultural Exchange sentong amungtsü mulunga agizük aser temeket aliba yimtsüngtemi iba benjung takok ngua amungtsü asoshi yariteptsü nangzük.
Tanü senden nung arrtsü anasa aliba Naga yimtsüngtem aser Assam nungi teshimtet nübotem adem.
BPCC(A-N) nung tawa tasen shimba working president Jiten Buragohain aser Coordinator nati anir teshimtet telok kati arrtsülen yimjung maparen inyaktsü atema onük benoka lemsatep.
BPCC(A-N) züngsemtemi benjung anogo nung Raffle Draw ka ayonga asayatsü lemtet.
Iba benjung atema EAC Longchem-i Assam nung Circle Officer, Mariani den yaritepa organizing committee ka shimtsü atema mapa nungloktsü.