AFC Cup: Chennaiyin FC-i Abahani Dhaka kokogo

Ahmedabad, Monupii/May 1 (Agencies): Mongolbarnü AFC Cup, Group E asaya nung Chennaiyin FC-i goal ka agi Abahani Limited Dhaka madak takok nguogo.
Asaya nung minute 79buba nung Abahani nungi asayar Wellington dak tsükdaker par goal nung goal ka idaktsüba sülen parnoki asaya makok.
2017-18 Indian Super League champions, Chennaiyin FC puri tang tashi nung asaya ana akokba aser ka draw asüba sülen point tenet nguteta lir aser parnok Group E nung temaba jenjang tongtetogo.
Group shia nungi takoker dang Inter-Zone Play-off semifinals atema qualify asütsü.
Bangladeshi club yagi kanga junga asaya tenzük aser minute anabuba nung parnoki goal idaktsütsü asoshi maongka angu, ajisüaka Rubel Miya-i metsüba corner Kervens Belfort-i tezüleni tongtok.
Chennaiyin FC pur asoshi goal nung ball inoktsütsü atema minute 21buba nungang maognka angu saka Mailson Alves-i tongoktsüba ball Shahidul Alam-i kanga junga nokdanga liasü.
Iba sülen minute 27buba nung Abahani puri goal idaktsütsü maongka angu saka parnok rongnungi asayar Sunday Chizoba-i metsüba ball Mailson dak ondak.
Minute ishika lir India striker Jeje Lalpekhlua-i Abahani penalty box-i ball kanga junga bener ai saka pai metsüba ball tezüleni oadok.
Asaya nung telok ana tsüngda kanga toktepa asayaa arur Chennaiyin puri minute 79buba nung goal ka idakja liasü. Thapa-i tabelen aliba defender kanga junga paitoker cross asüba ball Wellington Priori dak tsükdaker ai, aser iba ajanga parnoki asaya akok.
Abahani puri asaya tatem tashi kanga meranga asaya saka goal ka ya meküptokteti asaya tembang.
Club ana tsüngda May 15 nü Dhaka nung tanabuba leg asayatsü.