NSF 28buba Conference May 8 nungi tenzüktsü

Kohima, May 01 (TYO): Naga Students’ Federation (NSF) 28buba General Conference “For a just future” omen nung ajemdaker May 8 nungi May 11 tashi Wokha kübok Bhandari Town nung ayongzüka akatsü.
Mongolbarnü Kohima nung osangbenertem den jembidang Organizing Committee convenor, S Supongmeren Jamir-i, iba conference nung state pezü- Assam, Arunachal Pradesh, Manipur aser Nagaland nung aliba federating units 17 nungi tejaoker 2000 shi adentsü imlar, ta metetdaktsü.
Taküm ayongzükba conference yabo tesüiba mapangtem dang nungi balaka asütsü, ta shia Supongmeren Jamir-i, tang aliba ketdangpurtemi mangdang balaka nung iba conference liner, ta metetdaktsü.
Paisa, NSF-i bangzüng kar renemtsü aser tang teinyakdak NSF ketdangpurtem atema itemji telatetbatem asütsü, ta ashi.
Programme Committee convenor, Vipopal Kintso-i, iba conference omen nükjidong ya tarutsü atema teimla tajung kadaktsütsü aser lanurtemi parnok dak aketba tashi agi jenjang balala tongtettsü atema lir, ta ashi.
NSF Tir, Kesosul Christopher Ltu-i, conference host- Lotha Students’ Union (LSU)-i tejaoker 2000 atema nüngdak balala achaayanga inyakdar, ta metetdaktsü.
Pai ashiba agi, iba mongdang nung North East Students’ Organization, All Assam Students’ Union aser All Arunachal Students’ Union-ia shilem agia adentsü ta shogo, aser tetenzük sentong nung Eastern Naga Students’ Federation-a adentsü.
Paisa, tang Naga yimtenren teloktem aser India sorkar na tsüngda yimtenren ken o tejembidak lir, ibayongji NSF-i May 10 nü “The Naga journey- Hopes and Challenges” onük nung shisa lemsateptsü lemtet, ta metetdaktsü. Iba sentong nung o jembirtemji Neingulo Krome, secretary general Naga People’s Movement for Human Rights (NPHMR), Alezo Venuh, Envoy to the Collective Leadership & Co-coordinator, Working Committee NNPGs aser V. Horam, Executive Member, Steering Committee NSCN/GPRN nunger asütsü.
Ano May 10 nikongdang 2:00 ako nungi “The Naga political dialogue is in the right direction for a secure and just future” onük nung o tokteptsü aser iba nungji shilem agitsü atema federating units aser sub-ordinate bodies ajak nem metetdaktsüogo.
Ano 2019-20 kümsük atema NSF office ketdangpurtem election May 10 nü agitsü, ta pai metetdaktsü.
May 9 nü tetenzük sentong nung tetushi tejaokerji Nagaland Chief Minister, Neiphiu Rio asütsü aser cultural the regale aser valedictory sessions nung tetushi tejaokerji opposition Leader T R Zeliang aser Deputy CM, Y Patton na asutsü.
NSF Tiri Naga nunger aliba tesem balala nungi, kidanger state tem aser temeimer ajak dang iba senden nung adentsü pelashishia jaokogo.