Nübotok mapa inyaktsü atema Kohima nung senden amen

Kohima, May 01 (TYO): May 4, 2019 nü state tesem ajaklen nübotoka mapa inyaktsü atema sorkari lemtetba atema, aser tzüngluruwa mongpu atema terenemshiba asadangba senden ka tanü DPDB’s conference hall, Kohima nung Kohima Deputy Commissioner, Anoop Khinchi IAS leniba nung sorkar department ajak den menogo, ta tanü ketdangsertem osang ka ajanga metetdaktsü.
Senden nung Deputy Commissioner-i, district Administration den line departments kar nungi ketdangsertemi Kohima jila aser temeket nung tesem ishika semdangogo aser iba mapang nung nübotoka mapa inyaktsü atema tesem kar jangjaogo, ta metetdaktsü.
Paisa, nübotoka mapa inyakdang department balala amalitepa inyaktsü atema control room ka lapoktsü, ta metetdaktsü.
Pai ashiba agi, nübotok mapaji tongtibangsa kilentzü aodak, culverts aser ayongno nung tzü sadema aotsü atema merükteta amongtsü.
Senden nungsa Additional DC Kohima, Lithrongla Tongpi Rutsa-i mapa lemzükja aliba departments dang peipei tesem nung bendenba jana ajakji indoktsüla, ta ashi. Laisa departments dang nüngdak mesüra süngdong melensüktsüla saka jana agi dangbanga aliba kilentzü aodak ang junga merüktettsüla, ta ashi.
Iba senden tembangba sülen Kohima tesem balala nung mapa inyaktsü atema department balala aser ketdangsertem nem tesem balala lemzükja liasü.
Departments balala dang peipei tesem nung bendenba jana indoktsü atema gari achaayangtsüla aser kasa anogo nungsa janaji belener oa Dzuruzou nung aliba KMC dump site nung indoktsü metetdaktsü.