Chuchuyimlang nung Moatsü benjung amung

Mokokchung, May 1 (TYO): Chuchuyimlang yimdak Anü Mai Amphitheatre nung Moatsü benjung tulu ka ayongzüka mungogo. Sentong nung Assam nungi yar tsüngsanger telok ana densema aser kishikina yim nungi Yangpi (Chang), Hukpang (Phom), Chungliyimti (Sangtam), parnok den külemi ano Chuchuyimlang nung aliba yar tsüngsanger telok balalai shilem agiba ajanga tesentepertem kanga longsotepa mungogo.
Tanü iba sentong nung tetushi tejaoker The Hans Foundation (New Delhi) nung Chief Executive Officer, Lt. Gen. (Retd.) S. M. Mehta-i jembidang, pa nem iba maongka aser akhüm tetushi tulu agüja benjungi jaokba asoshi mezüngbuba pelaba lemsatep.
Pai asür Natwar Takhar nem akhümtsübu agüja jembidang, pai Chuchuyimlang nung mapatong tajung tenzükba ajanga par yimer dang masü saka Ao kin, Naga nunger aser North-East nüburtem nem tajangzük tulu agütsütsü imlar, ta ashi.
Tanü koba ola-angla aser yongsen mapa nung tetoktepba ka agiogo, ibai tenükshi mapa ka lir, asenoki benshiba sobaliba tajung kobasa lir, itemji wazüka ayutsübaji kanga tongtibang lir, ta ashi. Melenshia aobaji mepaitoktetba mapa saka sobalibaji mamatoktsüla aser kishikina den tesentaktep tajung ayuba yimya ya teti benshitsüla, ta paisa inyakdaktsüba o ka shisem.
Chuchuyimlang nung tzü agi timtemba reprangteta “water supply” mapatong ka inyaktsütsü ta paisa yimjak nung metetdaktsü. Tanep sentong tenzüka maodang liso nisungtemi yangluba osettsüset aser chiyungtsü tapu balala sayuba/ayokba exhibition stall ka tetushi tejaokerisa maongka agia lapoktsü.
Sentong nung Chuchuyimlang Village Council Chairman Wb. Aosanen Pongen, Ao Senden tir Wb. Chubawati, Chuchuyimlang EAC Vineikho Tetso, P.A to D.C Wb. Noklentuba aser Dr. Aotoshi parnokia mapang tatsütsü agia Moatsü salem den tayongzükba o tulu bener arua benjungmunger den lemsatep. Sentong nung tetsürtem sütakmentak aser teburtem yongsen mapa taksep atakba tetoktepba ka liasü.