NSCN (IM)-i Manipur nung camp toktsüogo

Dimapur, May 1 (TYO): Manipur kübok Sihai yimtsüng nung NSCN (IM)-i ozüng alema amentetba tesep toktsüogo, ta PRO (Defence)-i tanü sangdong ka nung metetdaktsü.
Iba tesep amentetba ya Ceasefire Ground Rules aser Ceasefire Agreement alema lir. Yimdaklirtemi timtem majurutsü atema sepaitemi iba onük atema teinyaktsü shitak inyakogo, ta parnokisa ashi.
Sepaitemi tesep tenteta aliba putetba sülen NSCN (IM)-i iba tesep toktsür aotsü ateam mapang peria agütsü saka parnoki toktsür maoba ajanga iba temeket alirtemi timtem ajuru. Sepaitemi tashi amshitsüsa NSCN (IM)-i merang saka küm 21 tashi yimjung olemtep liyonga aruba amajok mekümdaktsütsü atema sepaitemi aremzük, ta Defence PRO-isa metetdaktsü.
Ozüngi memelaba tesep tentetba ya tesasatsü ka lir aser iba inyakyim ajanga Naga nunger ashioktsür. Framework Agreement nung sign asüba sülen, NSCN (IM)-i ajungmesoaka sepaitemi aremzüka dang arur aser CFMG indang Chairman dangi iba onük aben. CFMG indang Chairman ket nung Nagaland adena orr inyaktsü tashi meliaka pa aser civil society organizations teyari ajanga NSCN(IM)-i Ceasefire Ground Rules nung aliba ama tesep toktsür ogo, ta paisa ashi.
NSCN(IM)-i tasa atonger nübortem nem Assam Rifles anema lungkak aitba sentong agidaktsü saka ibaji takok mangutsü, kechiyong sepaitemi Ceasefire Ground Rules nung aliba mapa dang inyak. Meyiper nübortemi NSCN(IM) anema noktaktsü, ta PRO-isa shisem.
NSCN (IM)-i iba mapa inyakba atema Manipur nung teloktem aser nübortemi mepelar. Anungji NSCN (IM)-i yimjung maparen nung tetsükdaktsü majurutsü aser nübortem taküm nung timtem magütsütsü atema Ceasefire Ground Rules sülen anidaktsü ayongzüker, ta PRO-isa ashi.