Tenla ki tajung

Asen lima nung asenok tamangertemi kanga temulung agüja inyakba mapa kaji tenla ki tulu aser tajung yangluba ya asütsü. Atangji, alima nung tesem ajak rongnung tongtibangtiba tesemji Tsüngrem külemba ki ya asütsü, anungji iba ki yabo sentsüwangshia yanglutsüla aser teronem menema ayutsüla. Aji oda, asen lima nung dang masü saka alima ajaklen nübortem tenük agi angutsüsa Khristantemi inyakba mapaji tenla ki tulu aser tajung yanglua toktsüba ya asütsü. Tanga limatem yutsür, talisa Israel lima nung akaba tenla kitemji reprangdangra akhi Khristan-temi yanglua toktsüba tenla kitem lir. Item nungji tanü tashi asenok ama alima tesem balala nungi oa semdanger raliwalirtem adenshia sarasadem mapang agir. Item ama asen lima nung dena tamangertemi temulunger tenla sen bendena tenla ki tulu aser tajung yangluba ajanga iba kidang oa külemer tekülemertem asosh dang masü saka iba yimti aser temeket topur jungdaktsür. Talisa, Nagaland yimtiba Kohima noksa nung Ao Baptist Arogo Kohima pur tenla ki noksa medeniang madoker. Aji oda, KABA tenla ki medeni agiba Kohima yimti noksajibo aküm maket, topur majung langka agi mabensa amai liasü. Iba tenla ki topur tajungji bendoker ano iba dang nung jagi kanga agia tajungba ka KABA-i yangertetogo. Atangji, iba tenla kidang Aor dang senteptsü saka iba tenla kijibo Aor kija meyong masü saka Kohima meyong kümogo. Akhi ama iba tenla ki noksa medeniang Kohima noksa mamshitsü aser madoktsü. Tanüla tsütsülen angutsüba tajangzükji yutsür, alima tsütsüa bilemdangra, Aotsür Aortemi Kohima topur ajungtsü asoshi inyakba mapaji topur tajung tenla ki tasen tuluka aser talangka yanglutsüba ya asütsü. Ashiko, lia lia Kohima nung Aotsür Aor ishibaang küma aotsüa akok saka asenoki inyakba mapa tajungjibo anogo shia nisungtemi angutsü. Iba amaji Kohima nung dang masü saka Dimapur nunga Dimapur Ao Baptist Arogoi tenla kitem ajak rongnung DABA tenla kisa tuluba asütsüsa yangluteta lir. Ano, iba tenla ki tuluba dak alaka DABA-isa tenla ki tulu tajung pongo tashi yanglua lir aser ano maneni yanglua odagi. Mokokchung town aser asen Ao lima nung yanglua akaba tenla kitem uluba aser ajungbajibo jembitsüa mali, ajak toktepa ulu aser tajung lir. Item ama tenla ki tajung nung tetsübu tarendak melii Tsüngrem külemtsüba tesem, mapang aser takümji jangratemtsüka lir. Asenok asoshi alima nung Tsüngrem yimliji ibaji asütsü. Iba ama mapang tajung nung asenoki Tsüngrem külemdaki aotsü atsüayongra, tenla agütsütsü korura aser Tsüngrem mapa inyaktsü memulungra, ashiko kenlirbo tanü asenoki yangluba Tsüngrem tenla kidangji asenok oa mekülemtettsüsa mapanga arutsü. Joko, asenoki Tsüngrem külemdak ki yanglutsü atemzükba renemadoker asünungji, asenok mapaji Tsüngrem den ochishia alitsü aser samaa aliba tanülatem anir aruba mapa nung tali temulung agüja inyaktsübaji asütsü. Ano, arogo lenirtem  asoshi tongtibang teinyaktsü kaji taintem asoshi dang masü saka tila tanurtem asoshia tekülemdak Sunday school aser parnok sentepdak ki yanglutsütsü mamatsüla. Aiben asenok taintemi taintem asoshi dang bilemer aser tanurtem asoshibo mebilemer. Iba jagi asen arogo aser asen tenla ki ya tanurtemibo parnok meyong masü saka parnok tsüraburtem meyong ama dang bilemer. Tarutsü arogo asoshi ibaji shisabolutsüka aser tanü asenoki yangluba tenla kidang amentsüsa asüng nisung marura, yimti topur ajungtsü kija atema yangluba ki aser raliwalirtem süidak tesemang ka kümadoktsü. Joko, asenoki yangluba tenla kidang nungi jagi  Tsüngrem metetba ochishir alima tenzüker, lokti lenir, nübortem asoshi rongsen molutetter aser tanüla anir arurtem agir magima aser yoker meyokma adokdaktsütsüsa asenoki sarasadem nung, Tsüngrem o sayuba nung aser ajungshitepba nung kanga temulung agüja inyaktsüla. Joko, tenla ki koma ajung yamaji asenok Tsüngrem o bushiba aser jembiba nung ajungtsüla. Tenla ki koda ulua yanglu, yamaji asenoki Tsüngrem mapa tuluba inyaktsü jangradi.