Sobaliba Arangtet Mong among

Dimapur, Monupii/May 02 (TYO): Mopungchuket senso telongjem Dimapur kübok Longmiasang Cultural Society Dimapur ajanga May 2, 2019 anogo Dimapur Town Hall, Super Market nung anepdang 10:00 ako nungi Sobaliba Arangtet Mong sentong ka ayonga agi. Iba sentong nung Dimapur lenden lima nung alir Mopungchuket nungertem zone balala lemsar akhi tetsü tebou mapang nungi amshia aruba Asem atemba (Entipong aser Asemkazü tsüngsang) aser Aor Shin O ratet nungi tetoktepba agia liasü.
Maneni iba sentong nung Wb. Merangtsüngba Lemtor ajanga meraküt tepur sobusolemtsü teratet lokti den lemsatep aser Wt. Yarsangla Jamir ajanga watsü kongro sobusolemtsü teratet agüja liasü. Iba sobaliba arangtet mong sentong ya Wb. Enyar Jamir aser Kr. Temsüjungla Ozükum lenisüba nung agi. Maneni Wb. N.Y. Themjen Ao ajanga tanü putu sobaliba tarensen temelenshitsüyim indang jembia liasü. N.Y. Themjen ajanga ashiba agi, Aortem sobaliba ya sobusolemtsü aser kenten menüba kisüng masü saka libaliru, yimya awashi ajunga keta lir.
Kasa sentong nung tayonger tenüng nung Wb. Tzüwatemjen Jamir-i tepela o jembi aser Sp. Moasosang Lemtur ajanga sarasadema sentong tembang.