Dimapur Urban Council Chairman Federation-i sangdonger

Dimapur, Monupii/May 2 (TYO): Honibarnü lokti nübutoka mapa inyaktsü asoshi District Administration-i tetuyuba agütsüba dak ajemdaker Dimapur Urban Council Chairman Federation (DUCCF)-i, kiyong balala nung chairmen tem dang pei kiyong nung aliba nüburtem ayongdena Honibarnü anepdang 6 ako nungi 8 tashi mapa inyaktsü metetdaktsüogo. Taruba tzüngluruwa dak rangloker kilentsü nung tzü bangdaka ayuba aser merla poktetba nokdangtsü atema May 4 nü mapa inyaktsü aliba rongnung tongtibangtibaji kilentsü merektettsüba asütsü.
Kiyong ajak dang parnoki kilentsü nungi agitetba janatem tesem ka nung bendentsü asoshi metetdaktsüogo, ajiasünungdang DMC garbage machinery temi jana ayong ayonga bendentettsü. Jana bendena aliba tem bener oa indoktsü atema chairmen tem dang DMC sanitary in-charge den iba number; 9615217798 ajanga tongteprateptsü metetdaktsüogo.
Ano maneni kiyong balala nung chairmen tem dang DUCCF, general senden May 4 nü Tourist Lodge nung 3:00 ako nungi tenzüka akatsü nenshia metetdaktsüogo. Ajungji Dimapur Municipal area kübok chairmen tem ajak dang iba senden nung tamakok maludaktsüi aru adentsü asoshi metetdaktsür, ta Information & Publicity Secy DUCCF-i sangdong ka ajanga metetdaktsü.