Dimapur nung Nokpu Sensosangeri Moatsümung kanga longsoa mungogo

Dimapur, Monupii/May 02 (TYO): Brihostibarnü The Oaisis, Khermahal Dimapur nung Dimapur Nokpu Senso Telongjem (DNST)-i ayongzüka Moatsümung kanga longsolongbena mongogo.
Moatsümung sentong nung tongti tejaoker o jembidang, Additional Commissioner Income Tax, Imokaba Jamir (IRS)-i, “Sobaliba teratet ya kanga tulu, kechiyong sobaliba ya lenla ajak den sendaktepa lir. Ajisüaka asenoki kanga bulua yimtitem nung oa litepba, mass media aser internet agi asen sobaliba tashi meiti kümdaktsüdar, anungji asen sobaliba wazüka ayutsü atema kanga nüngdak kümogo,” ta metetdaktsü.
“Tanü putu nung asenoki TV channel 300 dak tema repranger, aser itemji ajanga asen taküm nung kongshia tangar jilu benshidang asen sobaliba samar,” ta pai ashi.
“Oshi aser asen sobaliba na kanga sendaktepa lir, kechiyong asenoki oshi agi tangar den jembir. Tesüiba küm 200 tsüngda India nung oshi 200 dak tema samaogo. UNESCO-i alima nung samatsüsa aliba oshitem (endangered languages) sangdongba rongnung Ao oshi densema lir. Anungji asen oshi wazüka ayuba ajanga asen sobaliba wazüka yutettsü,” ta paisa ashi.
“Sobaliba ajanga asen maitsü shisanger, tetezü ketdaktsür aser nüma tanga lidaktsür,” ta pai ashi
“Asen otsüla-oboula nunger ochi aser tongmelang liasü; parnoki mapa meranga inyak aser tain akhümtsübu. Itemji akhidang nungi benshia aruba yimya tajungtem lir. Itemji asenoki wazüka benshitsüla,” ta paisa shisem.
“Azümesenba agi loktiliba raksatsür, yimjung, azükaru aser telongjem malir, anungji mapa meranga inyakba yimya sübatsüla,” ta paisa shisem.
Tanep sentong tetenzüklen DNST Tiri lokti pelaa agizükba o jembi, Er. K Chuba Longkumer-i Moatsü ratet metetdaktsü aser DJST Tiri tepela o jembia liasü.
Sentong nungsa Sangpang Changer & Langa Changer nati Moatsü ken ka aten aser Dimapur Nokpu Students’ Union-i Moatsü yar tsüngsang ka ajanga shilem agi.
Sentong tatembanglen Moatsümong kenten aser Jilushi sentong agi, aser tatemsa DNSCS Chairman, Er. Moaliba Imchen-i melepzüng o jembiba sülen Moatsümong chiyungtep.