Sihai Camp nung tatalokba bentetogo: GPRN

Dimapur, May 02 (TYO): Sihai Camp nung tatalokba kanga junga bentetba atema Government of the People’s Republic of Nagalim (GPRN) anisüngzüker, ta tanü GPRN MIP sangdong ka ajanga metetdaktsü.
“Iba onük ya India-Naga tim yimtenren jenjang ka nung latettsü atema onoki hopta ka jungnüa nokdaka liasü, kechiyong iba ya mitkar onük masü saka yimtenren onük ka liasü. Ajisüaka Indian Amry indang Eastern Command-i parnok indang PIB (Defence) sangdong nung agütsübaji ajanga iba onük nung mitkar sentsü sayubaji kanga tia maka. Langa angazüktsü atema putiotsüsa tajungba,” ta kasa sangdong nung shia lir.
“Yimtenren temaba jenjang ka nung iba onük jembidang aser tatembangsüa yimtenren ken o latettsü aliba mapang ka nung kechiba mitkar ayongdener, ta tasüngdanga arur. Eastern Command, Indian Army-i sangdong agütsüba ajanga NSCN anema tejashi aliba sayur, iba atemaji sasar. Tensa reprangtsü atema Sihai-i yoka aliba AR ketdangseri item mapang ajak nung, oarnoki temaba ketdangser tetuyuba tashi angaa inyaker dang ta shiogo. Yamaji süra iba sangdongji parnok nem tetuyuba agütsür temaba ketdangseri agütsütsüla, sangdong agütsütsü atema shidakba temaba ketdangserjibo Ministry of Home Affairs (MHA) asütsüla,” ta MIP sangdong nung shia lir.
“Naga yimtenren maparen ya nüburtem maparen ka lir. Küm 71 dak tema raraa aruba piyong Naga nunger tebilemba densema lir. Anungji Eastern Command sangdong nung shia aliba ama NSCN-i nübur ajungmesoba mesüra NSCN-i asalentongba madoker. Naga nungeri Mass Rally ayongzükbaji parnoki yimjung meimba aser yimtenren onük tatembang süa latetdaktsünüba ajanga inyakba lir. Mass Rally ji AR anema masü mesüra NSCN anema masü saka rara madoktsü atema tensa süngjemdaktsütsü asoshi liasü südi ta onoki amanger,” ta MIP sangdong ajanga metetdaktsü.
NSCN-i PIB (Defence) dang, sangdong agütsüba maparen kanga kümdanga inyaktsüla aser parnok kübok maliba onüktem nungbo alia oa meinyaktsü metetdaktsütsüsa akumer, ta kasa sangdong nung shia lir.