State Home Department-i Fani yipru atema sangdonger

Kohima, May 02 (TYO): Fani ta ajaba yipru mopung tesashi agi northeast-a kongshitsüa akok, aser iba dak sendakba nung Brihostibarnü Nagaland State Disaster Management Authority (NSDMA), Home Department-i IMD, Regional Office Guwahati den külemi senteper taruba anogo ishika atema tsüngsang mopung dak sendakba osang metetdaktsüogo.
Regional Meteorological Centre (RMC)-i Nagaland densema north east state tem nung tzünglu aser tsüngperet den mopung ghonda ka nung kilometer 30-40 kera aontsü ta asadangtetogo, aser May 3 nungi May 6 tsüngda tzünglu kanga sashia arutsüa akok ta shiogo, ta OSD to the Govt. of Nagaland, Johnny Ruangmei-i sangdong ka nung metetdaktsü.
“Fani yipru ya Bay of Bengal nung kümtet aser West Central Bay of Bengal nung aliba yipru ya tesüiba ghonda trok tsüngda North-North-East tsütsüleni ghonda nung kilometer 16 keraa ona liasü aser May 2 nü anüngdang 11:30 ako nung West central Bay of Bengal nung Puri (Odisha) nungi kilometer 360 shi pilar liasü. Iba yipru ya North-North-East tsütsüleni aontsü akok aser May 3 nü nikongdang Odisha tzüyimkümlen ghonda nung kilometer 170-180 keraa süitsü,” ta sangdong nung shia lir.
Iba denji sendaktepa Nagaland nunga hopta piyong tzünglu arutsüa akok.
NSDMA Weather forecast ajanga ashiba agi, Cyclone Fani ya tashi maitba küma north-east state leni arutsü. May 5-6, 2019 anogotem tashi nungbo tesem aika nung tzünglu den tsüngperet aser tsüngmok amoktsü aser tesem kar nungbo tzünglu kanga sashia arutsü.
Iba dak sendakba nung NSDMA, Home Department-i nüburtem dang iba mapang nung kanga kümdanga alitsü mepishia metetdaktsür, ta sangdong nung shia lir.
“Tsüngperet aser tzümetsüng lendong nungi kümzüka alitsü atema süngdong tulu kübok mejenoktsüla aser ayongküm anasa malitsüla,” ta parnokisa metetdaktsü.
NSDMA, Home Department-i kümzükba maparen inyaktsü atema NDRF team ka CTI, Home Guard & Civil Defence, Toluvi, Dimapur nung mapa lemzüktsüogo; Home Guards aser Civil Defence den yaritepa inyaktsü atema State Disaster Response Force nema iba osang metetdaktsüogo, ta kasa sangdong nung shia lir.