Tanüngba election anepdang 5:00 ako nungi agitsü atema mepishir

New Delhi, May 03 (Agencies): Supreme Court (SC)-i Election Commission dang Lok Sabha elections tanüngba shilem ajak anepdang 5:00 ako nungi agitsü atema temepishiba agütsüba nung telemtetba agiang, ta tuyuogo.
Joko linük tesem aika nung anüngdangbo kanga tatsük kümogo aser Muslim nunger temeshi ita Ramzan-a atonger, anungji election anepdang 7:00 ako nungi agia aruba mapang atsüzüka anepdang 5:00 ako nungi agitsü atema Chief Justice of India (CJI) Ranjan Gogoi-i aniba bench ka nem temepishiba agütsü.
Iba bench nung justices- Deepak Gupta aser Sanjiv Khanna nata densema lir.
SC bench-i, “Nüngdakba tetuyubatem agütsütsü atema Election Commission of India dang tuyur,” ta metetdaktsü.
Iba temepishibaji advocates- Mohammad Nizamuddin Pasha aser Asad Hayat nati agütsü; temepishiba nungji tenati Lok Sabha election tanüngba shilemjibo anepdang 7:00 ako nungi masü saka ghonda ana mesüra ghonda ana ser tesadang atsüzüker anepdang 4:30 ako mesüra 5:00 ako nungi agitsü mepishia lir.
Temepishiba shidi nungji advocates-i SC dang, “Linük tesem aika nung kanga tatsük kümogo aser Ramzan ita-a atonger, anungji tang tagidak Lok Sabha election shilem 5buba, trokbuba aser tenetbuba shilem nungbo May 6, May 12 aser May 19 anogotem nung polling mapang ghonda 2-2.5 atsüzüker agitsü atema Election Commission of India nem tetuyuba agütsüdaktsüner,” ta shia lir.
Temepishiba shidi nungsa, Ramzan ya Muslim nunger atema lumia sarasademba temeshi ita lir, aser Ramzan ya Lok Sabha election shilem pongububa agiba anogo, May 6 nungi tenzüktsüa akok, ta shia lir.
Advocates anati ashiba agi, parnoki Hombarnü (April 29 nü) Election Commission nem kasa temepishiba agütsü saka tang tashi Election Commission-i telangzüba magütsür, ta metetdaktsü.