Mamata sorkari West Bengal nung cyclone Fani atema renemshir

Kolkata, May 03 (Agencies): Tanep Cyclonic Fani agi Odisha tzüyimkümlen kongshia liasü, aser iba yipru dak sendakba nung West Bengal Chief Minister, Mamata Banerjee-i taruba ghonda 48 atema lokti senden ajak thinenogo.
Chief Minister-isa state ketdangsertem dang state kübok tzüyimkümlen aliba district, Midnapore nungi iba tensa mita atatsü tuyuogo.
Tanü Trinamool Congress tongti aser CM, Mamata-i twitter ajanga, “#CyclonicStormFANI lendong aliba ajanga ni taruba ghonda 48 lokti senden ajak thinenogo. Onoki tensa mita atadar. Ni nüburtem dang kanga amalitepa alitsü mepishir. Taruba anogo ana kanga kümküma alitsüla aser lendong majurutsüsa kümdanga alitsüla,” ta metetdaktsü.
Ano külen West Bengal sorkari tzüyimkümlen aliba districts- East Midnapore aser South 24 Parganas districts nung bendanger raliwalirtem dang tzüyimkümlen nungi aienshitsü aser angopurtem danga tzüyimi maotsü metetdaktsüogo.
Ano ketdangsertemi school tema shibangtsü metetdaktsü.
Ketdangser kati ashiba agi, Kolkata dak alia West Midnapore, North 24 Parganas, Howrah, Hoogly districts, Jhargram aser Sundarbans nunga yipru lendong atema tekümdangtsü metetdaktsüogo.
“District shia nung tensa mita atatsü metetdaktsüogo aser iba yipru dak sendakba nung control room ka lapokogo,” ta Chief Minister-i metetdaktsü.
State secretariat nung rongdak senden ka mena Chief Secretary Malay Kumar De leniba nung committee ka tentetogo, aser parnoki tensa ajak mita asadangtsü.
State Disaster Response Force team pezü South 24 Parganas, East Midnapore aser Hooghly district-i yokogo iba dak alia teyaritep maparen inyaktsü atema PWD, fisheries, irrigation, power aser PHE departments-i control rooms lapokogo.
Tanep ‘Fani’ yipru Odisha tzüyimkümlen aliba Puri tonga arua tesem aika nung mopung ghonda nung kilometer 180 ona liasü aser nisung asem asüba osang jangjaogo.
Iba yipru ajanga state yimtiba, Bhubaneswar densema tesem aika nung süngdong meyirjanga lao aser ki aika raksaja liasü. Cyclone Fani yagi Hokolbar ayaterm nung West Bengal kongshitsü aser iba yipru ajanga northeast state tem nunga tzünglu sashia arutsü, tsüngperet den tsüngmok amoktsü aser mopung sashia aontsü ta ketdangsertemi metetdaktsüogo.