BJP-i Tripura nung CEO agientsü akhanger

Agartala, May 3 (Agencies): BJP-i Hokolbarnü Tripura Chief Electoral Officer (CEO) Sriram Taranikanti agientsü atema takhangba agütsü.
Sriram Taranikanti ji tasa atonger ka ta BJP-i tai tongloktsür.
Defence Minister Nirmala Sitharaman-i anir züngsem 6 agi akümba telok kati Delhi nung Election Commission (EC) ketdangsertem den ajurutep aser Taranikanti melentsü takhangba agütsü, ta State Bharatiya Janata Party (BJP) otongdar Nabendu Bhattacharjee-i ashi.
Tripura West parliamentary menden atema Lok Sabha election agidang CEO-i CPI-M tashi angaa election ketdangsertem nem voter meindaktsü, ta Bhattacharjee-isa ashi.
“CEO dang masü saka Tripura Election Department aser district ketdangsertemi CPI-M aser Congress den yaritep. CPI-M-i aniba Left Front sorkari küm 25 tashi yimsü süa aru. Anungji, sorkar ketdangser aika parnoki azüoka lir” ta paisa tai tongloktsü.
“BJP anema tasa atongertem rongnung CEO ya ka lir. Tripura nung Lok Sabha menden ana atema elections agidang pai CPI-M aser Congress den yaritep” ta BJP lennir aser Law & Education Minister Ratan Lal Nath-i ashi.
“Election Commission-i democracy aser state nung nübortem atema CEO tangsa tang agientsüla” ta Nath-i takhangba agütsü.
Külen, BJP-i CEO dak tai tongloktsüba atema opposition Communist Party of India-Marxist aser Congress teloktemi aitsü.
“Yaküm Assembly elections nung BJP-i Left party tem tamakok ngudaktsü. Iba mapang CEO ji Sriram Taranikanti liasü. Idangji Taranikanti ji BJP atema ‘hero’ liasü saka tangbo pa nisung tamajung kümogo” ta CPI-M Tripura state secretary Gautam Das-i ashi.
“CEO-i kodanga political party ka posema vote enoktsütsü atema mashi. Lok Sabha elections mapang pai pa teinyaktsü inyak” ta Das-isa ashi.
“BJP-i Tripura West Lok Sabha ajunga agitsü merangba tasa tang yimjak nung adokogo” ta paisa shisem.
“February 21 nü onoki Tripura West menden atema Returning Officer Sandeep Mahatme anema ken o benok. EC-i Mahatme aser Additional Director General of Police (Law and Order) Rajiv Singh na mapa nungi anentsüba ajanga onoki benokba onük metentsü” ta Das-isa metetdaktsü.
Tripura Pradesh Congress Vice-President Tapas Dey-i ashiba agi “BJP indang takhangbaji tim masü aser mamangteter.”
“Küm ka tejaklen Sriram Taranikanti ketdangsüba kübok state Assembly election agi aser iba mapang BJP-i Left party tem madak takok tulu angu” ta Dev-isa ashi.