Cyclone Fani agi kongshiba states nem sen cr. 1,000 agütsüogo

Bhubaneswar (Odisha), May 03, 2019: Tanü Cyclone Fani agi ghonda pongu tsüngda Odisha tzüyimkümlen aliba districts nung süngdong meyirjang aika laodaktsüogo. 

Hindaun city (Rajasthan), May 03 (Agencies): Tanü Ato kilonser, Narendra Modi-i, Fani ta ajaba yipru mopung agi kongshiba state tem nem jelia sen crore 1000 dak tema agütsüogo, ta metetdaktsü.
Rajasthan kübok Hinduan nung Lok Sabha election atema nüboyim sentong ka nung jembidang Modi-i, lendong mapang nung par sorkar nüburtem den lir, ta ashi.
Review senden ka menogo aser Cyclone Fani indang osang metetdaktsüogo, ta shia Modi-i, Hokolbar anepdang yipru mopung tesashi agi Odisha kongshi, ta metetdaktsü.
Congress Party aija Modi-i, election mapang ka nung Jaish-e-Mohammed (JeM) tongti, Masood Azhar International kiralongrar ta sangdongba atema Congress jashir, ta ashi.
United Nations (UN)-i JeM tongti Azhaar International kiralongrar ta sangdongba atema pelatsüla ajisüaka opposition party-i election mapa nung ibaji sangdongba atema ashishir, ta paisa ashi.
“Paji International kiralongrar ta sangdongtsü atema UN-i Congress, Madam (Sonia Gandhi) mesüra Naamdar (Rahul) dang tama asüngdangtsüla asü?” ta Ato kilonserisa ashi.