Bhandari nung taruba NSF mongdang atema senden amen

Wokha, May 03 (TYO): May 8 nungi May 11 tashi Bhandari nung Naga Students Federation (NSF) Conference ayongzüka amongtsü aliba dak sendakba nung Advisor, Mmhonlumo Kikon-i ayonga Bhandari nung office balala nung tekolakpurtem aser organising committees coordination senden ka menogo, ta tanü ketdangsertem osang ka ajanga metetdaktsü.
May 2, 2019 nü ADC’s conference hall, Bhandari nung iba senden nung jembidang Advisor, Mmhonlumo Kikon-i office balala nung tekolakpurtem, kaketshir lenirtem, lokti lenirtem aser committee balala nung züngsemtemi taruba Conference ayongzüka akatsü atema meranga inyakba atema pelaba lemsatep. Paisa, iba sentong takok ngua agitettsüji ajak teinyaktsü mapa lir, anungji maneni tajungtiba agi meranga inyaktsüla, ta ajungshi.
Iba conference akatsü atema terenemshiba onüktem nung o lemtep, aser iba mapang nung Lotha Students Union President, Libemo Tsopoe, Co-convenor, Jungithung Yanthan aser tangartemi tembanga inyakba mapatem osang metetdaktsü.
Senden nungsa gari lenmang ulushiba, merüktetba aser lenmang atepshiba, tejaokertem anenzüktsü, electrification, light methitemi yoktsü, network services, metsümeshidak, tzü supply, transportation, medical, security, financial mobilisation aser infrastructures atema jembia liasü.
Tesülen Advisor den ADC Bhandari, Tiameren Chang, office balala nung tekolakpurtem, kaketshir lenirtem aser committee balala nungi züngsemtemi conference nüngshilong azüngtsü aliba tesem, mongdang ki yanglutsü aliba tesem aser ainertem anentsü aliba tesemtem semdanga terenemshiba maparen balala asadanga liasü.