Ochishia aser tasü itta inyakertem nüngdaker

Karnataka kübok Shivamogga nung tehsildar (tax officer) kati aayanger ka ama Gejjenahalli yimtsüng nung lung atudak ka nung mapa inyak. Idakji pai ochimashi mapa inyakbatem mita reprangba den kanga junga bushisüngdangba sülen, tatem nung pai anir ketdangsertemi tawa tu iba tesem makogo. January 2017 nungi BN Girish-i tehsildar ka ama inyaktsü tenzükba nungi ozüng alema lung aser lisem atuba maparen anema kanga dang tasü itta inyaka arur. Külen, Haryana nung IAS officer Ashok Khemka küm 27 tashi sorkar mapa inyaka arudang mapa 57 ben tashi melenshiogo. Ya kechiba ta süra, Khemka ya ochishir ketdangser ka lir aser tai inyakba mesüra miimmechi inyakba maparen pai kanga dang tasü itta yimjak nung tuteta prokshiba aser anema inyakba atema pa mapa belenpet belenshir. Maneni, Karnataka Administrative Service (KAS) officer K Mathai-ia küm 10 tashi inyaka arudang sorkari pa mapa 27 ben tashi belenshiogo. Mandya Urban Development Authority (MUDA) nung sen crore 300 dak tema tim mesüi amshiba inyakyim pai puteta yimjak nung metetdaktsüba sülen nungi sorkari pa mapa belenpet belenshir. Taoba ita tu sorkari K Mathai mapa melentsüba osang metetdakja liasü saka April 29 nü pai iba anema Karnataka State Human Rights Commission (KSHRC) tsüngdang onük ka benok. K Mathai-i Karnataka Chief Secretary den külemi IAS officer 9 anema onük benokbaji KSHRC-i agizükogo aser tang angadangdar. Kechiba item sorkar ketdangsertem indang jembir ta süra, tanü India linük nung parnok ama ochishir aser tasütait ketdangsertemi agi anünga lir aser aika nüngdaker. Asen linük nung miimmechi aser ochimashi inyakyim ya taküm libaliro ka ama dang kümogo aser iba ajanga linük tejakleni maoer. Nagaland nunga miimmechi aser ochimashi agi asenok tim atemer aser asen loktiliba kangshiba den rajang akümer. Sorkar ketdangsübaren nung miimmechi aser ochimashi inyaksangshi ya yimya ka ama dang kümdaktsüba ajanga asenok kangshir. Sorkar ketdangser aser mapa inyaker aikati kanga dang otiotia iba mapa inyakba ajanga asen lima mainer aser tesüleni alur. Nagaland nunga BN Girish, Ashok Khemka aser K Mathai ama ochishir aser tasütait sorkar ketdangsertem aser mapa inyakertem nüngdaker. Tanü lanurtemi danga tasü itta aser ochishia sorkar ketdangsübaren nung shilem agira aser inyakra, tarutsü Naga putu tiaji jangratemtsüka ka asütsü saka yamai dang miimmechi aser ochimashi nem kokdaktsür ora, ayatai tia ajurutsü.