Tsüngrem peladaktsüba linüktem temoatsü

~  Zülu Longkumer.

Tanü alima nung kin ajak madak tashi tulutiba ya America lir, ali rongsen, shisatsü balala bushiba aser military, aser meimchir sobaliba libaliru yimya ajak nung lasa tulutiba tematiba aser lai aniba nung alima ajungai anidaker , ya angudang koda sür alima kati lenmang ajunga nung la tematiba kümer yamai tashi itta aser merena liteter ta kanga süngmanger, kechiba süra America ya linük rongnungbo tain masü,Egypt, Iran, Iraq, China,India amalai anir küm mirijang aika tain linük aika lir saka America yabo pa independent linük ka ama akümbaji 1776 nungang tenzük saka küm noklang ana asemka tsüngda nung la alima ajunga madak tematiba aküm aser alima ajungai la dak dang rangloker alir. Anungji küm 15-16 ka shi tejaklen ni America nunger missionary ka ajura sensaksemdang, ni pa dang “America ya koda sur ita olua merener (?) ” ta asüngdang, idangji pai langzü, ” onoki ozü limaji Tsüngremer shisatsü dak ajemdaker yanglu” ( because we created our nation based on God’s principles). Aser idangji ni par otsü nung aliba shirnok dang, ” The pilgrim fathers / The founding fathers’ ta ajar, item otsü ya bilemtet aser kü mulong nung asüngdanga aliba ajak telangzüba angu. Iba otsü ya Europe nung tenzük, anungji asenoki ilen nungjagi tenzüka bushidangdi.
America ya Christopher columbus-i 1492 küm ngutet aser idangji yangji alir nisungtemji kecha memetetba tia nung liasü, anungji Europe nung linuk balalai oa tesem tesem nung colony tilala tenzüka ao, idangji north America nungji British aser France nungertemi teimba colony küma ao .Tamapurtemi timtem balala aika ajangshia item colonytem aküm aser tanemtanemi nütsüng renloka ao. Kasa mapang nung ya Europe nung tamangba yimsü nung Martin Luther-i arogo-i ( Iba mapang ya arogoji Catholic kija liasü) benshiba yimyatem ya Lai O ten meputep aika lir, anungji melenshitsüla ta apuso aser pa den nübor aser temetetertem aika densem aser Europe ajunga nung iba milak jangrua mangatettep tulu adok. Kasa telokji England nunga adok aser parnok rongnung Puritan ta ajaba telok kati Catholic arogo-i benshia aliba yimyatem kechisa Lai O den meputepi benshir, itemji anenang ta tashi agi ayimten aser idangji England arogoji England chuba yimli kübok liasü , anungji chubar sorkar-i memulong aser parnok rishikangshi aser tanishir karbo tepuokdak ayu, anungji parnoki England toktsür Netherlands bushia atu aser yangji kenpika ali, saka oshi aser sobaliba balala asünung parnoki tatem nung America-i aotsü aser yangji meinprong timtem mekai pei amangnüba amanga ajemalua yimjung nung alitsü lemteta renemer apusoa ao. Parnoki rong ka tenüng agi “MAYFLOWER” ta sür yangji mener tzüyim ajanga America bushia ao aser parnok ajak agi nisung 102 liasü. Yangji parnok tamangtir (pilgrims) 41 ten tetsür tanur, kilirtem aser ano mapa balala nung nübu tajung kar aser tsürabur malir tanurtem ishika dena liasü. Parnok America atongtsü anasa tzüyim nung yipru tulu adok aser parnok tanendak ajanga talangi mopongi bener ao aser talangka timtema manenteti senzür, tatem nung Mississippi ayong Atlantic tzüyim nung yimokdak, koba dang Plymouth ta ajar, aji atong. Parnoki rong nungi maludang tamasa parnok tipdema inyaksangshia alitsü atema parnok rongnung tanishir shim aser temzüng yanglua teburtem ajaki sign sütep. Parnoki iba temzüng nung ya parnoki Khrista osang ajaklen sangdongtsü aser parnoksasa yimsü süa nisung ajak kasa jenjang nung lokti-i mulongba temzüng kübok ajemalua alitsü ta zülusema ayu. Tashirtemi ashiba agi, iba ya alima nung mezüngbuba democracy dak ajemdaker yangluba Temzüng ozüng (Constitution) lir. Iba tezüluba dang ya “MAYFLOWER agreement / MAYFLOWER COMPACT ” ta ajar aser iba sülen parnoki rong nungi alua tzükümji atong aser pelatepa parnoki “iba lima ya onoki Tsümgrem nem bendanga agütsür aser yangi meimchir ajak kasa jenjang nung alitsü, ” ta nangzüka sarasadema Tsüngrem nem tenüngsang agütsü aser parnoki Europe nungi bener aruba tsükmenatsü agi yangluba yi ( wine) ishika anünga aliba, aji pelatepa lemsatepa ajem. Iba ya 1620 küm December ita 26 nü liasü. iba mapang ya osang abentsü asoshi Radio ,telephone aser telegraph amala oset kecha mali asünung, parnok kija timtem aika agi meketbanger liasü aser anasa colonytem ali mali memeteti kenpiga lia aru. Tesülen tanemtanemi Europe nungi nüburtem arua colony tasen jenti küma renloka ao saka iba telok tila kati Tsüngrem dang nangzükba aser tejangraba milak ya mesepdaktsüi bener aru. Kasa mapang nung ya Laishiba ya joko English aser European oshi aika nung meyiper aser kaket ajenba kol yangluteter asünung, Laishiba bulua angu aser nüburtemi angateta azüngtsü tenzük(aji masüdangbo Laishiba ya Latin oshi nung dang zülur liasü aser aji tashir tazünger kari dang züngtet aser tashir tazüngertemjia kanga dang ajema liasü aser ano arogotemia nüburtem nem Lai azüngtsü temelaba magütsüi liasü ) aser Tsüngrem osang kintem dangi abentsü jangraa aküm aser alima kinük ajakleni Khrista osang bener missionary-tem prokshia ao. Tesülen iba temoatsü agi kongshir rongnung asen Naga kina densema lir ta asenoki bilemtetdi.
Küm aika sülen 1775 nung parnoki British sorkar kübok malitsü ta nokdak aser rara tulu adoka parnoki 1776 nung independence declare asü aser parnoki alima asoshi temzüng ozüng yanglutsü tenzük aser itangji parnoki tamalen tamangtirtemi yangluba temzüng kaket Mayflower compact dak ajemdaker yanglu ta ashir aser parnoki iba temzüng nungya “meimchir ajak tsüngremi kasa jenjang nung yanglu aser kasa nüchiso akatsü tiem ” ta züluoka ayu. Item temzüng dak ajemdaker liyonga arudang parnoki alar ayuba yimya ya lai O den meputet aser teim masü ta angateta melenshitsü tenzük aser parnok rongnung mangatettep adok, kechiba süra state aika aluyimba nung ajemdaker dang nokdaka liasü aser iba mapang alu inyaktsü machinery mali asü anungji parnoki alar Africa nungi tashiyim agi poer aruba tanak nisungtem sen agi alizüka parnok aluyimba aser mapa balala nung amshia liasü. Tatem nung alar amshiba state tenet-i külemi malitsü ta sür rara tenzük.Iba rara ya 1861 nungi 1865 tashi rara aser American continent nung tanü tashi iba rara ya tulutiba aser yangi nisung 7,50,000 shi asü ta ashir.Tatem nung northern telok shirnoki alartem chioktsüla ta ashi parnoki akok aser alartem alena aliba temzüng ozüng ajak raksa indoka alartem chioka nüchiso agütsü. Oda meimchir lokti kati Tsüngrem pelatsüsa inyakba rongnung tulutibaji ya ka asütsü ta nisungtemi amanger kechiaser alima tenzüker meimchiri alartem alener mezüngmeshia rishikangshia aruba talenba teti asoshi parnoki sala chioka nüchiso agütsü aser pei den kasa jenjang nung yimli agüja amshi. Ano kenpika lir parnoki tetsürnema yimli agütsüa alima yimsüsüba aser maparen ajak nung teporten kasa jenjang nung amshitsü tenzük.Aji masüdangbo tetsürtem yimsüsüba mapa nung vote magatsüdaktsü aser kecha shilem mali asü.Ano parnoki nisungtem linuk balala nungi timtemertemi anir shirnoksa pei lima toktsür America-i arua ayanga linü parnoki pelashishia agizüka parnok den kasa jenjang nung teimtem aser meinperong mekai lidaktsü aser parnoki nisungtem shinga tamangba yimsü, sobaliba, oshi , kin kidong, tila tulu mesüra teküp sentsü balala dak ajemdaker bendangperia mamshi.Iba amala tangatetba tajung agi parnoki tsürabur aser tetsü tebo nungi benshia aruba yimya aser sobalibatem kechisa tim masü ta parnoki ajitet, itemji marendaki melenshia aru. Iba amala temelenshi America lima nung ataloka aoba angudang bendangertemi aji ajizüka pei lima nunga temelenshi bener arua alima kintem tejakleni ao aser idangji ajak madak America jisa tali tematiba jenjangi ajungketta atu ta parnoki jembir.America nungji tajung dangbo masü saka ano tamajung tesempatsü aser Tsüngremi memulungba maparen jenti lir aser aji agi par lima dang masü saka alima aisü nung aiben raksaja benjatsür saka aji agi yimten dak tashi agibo mekongshir kechiba süra lokti tangatetba aser temulungtetba tubo aki ama memelenshi-e lir,item otsütem angashia aser metetta arudang missionarybai ashiba O tu kanga dang shidak ta amanger. Oda nisung kati Tsüngrem peladaktsü nungangsüng par kibong aser yimti tena moatsür nung lokti kati küm paika Tsüngrem peladaktsüa aruba memoatsüi lidima? sürabang ano Tsüngremeri balaka sayatenya nung moatsür ta teshiba linük karbo lir mali? Asen ASIA continent nung asenoki ken reprangdangti. South korea ya kanga dang tejakleni aoba lima ka lir saka parnok tamalen yamai mali asü anungji asenoki ya ken ajidangti.
Korea ya tejen lima ka lir aser North nung China den artsü aser kinük asemsü tzüyim agi meketbanger anüdoklen tzüyim ajanger külen Japan lima lir aser Korea ya BC 400 tashi nung kanga civilise sür aliba lima ka lir saka pa ya aiben bendanger yimli küboki aitsüsa aküm aser idangji timtem tulu aiben ajurua aru. Korea lima ya Buddhism aser China nungi bener aruba confucianism tamangba amanga liasü aser ano hindu nunger ama caste system ya-a benshia liasü.1603 AD nung Korea nunger YI GWANG JEONG China nung ambassador inyaka liasü aser pai ITALY nunger China nung missionary ka tenüng agi Matteo Ricci ta sür kati China oshi nung theology kaket kar züluba item kaketem bendena Korea-i bener aru aser pai aji kanga taroki yia zünga shisadanga liasü aser ibai christian süngjang Korea nung mezüngbuba perokba liasü saka iba sülen chuba balala arudang christian yimsüji samaja sa liasü. kodang korea lima ya lapoka bendanger aitdakja shishilemba tenzük tamangba yimsü nunga yimli lapoktsü aser 19th century tatemlenbo catholic o protestant missionary ajak anioka liasü aser iba ya ajanga temelenshi tulu aru. kodang Missionarytem aru parnoki school aser college 293 den university 40 lapokja ao aser yangji parnok tanishir aser kibong tajung chirnurtem azüng aser parnok tenük lapoka par sobaliba caste system ya tim masü ta angatet aser aika christian küma ao. 1910 küm Korea ya Japan küboki aitsüsa aküm aser idangji Japan nungeri tashiyim agi yimsü asü. Parnoki christian yimsü anem aser Korea nungerji Japan nunger kümdaktsütsü merang. Parnoki office aser school nung Korea oshi mejempidaktsü aser ota lia liabo pei kidang angsüng mejempidaktsütsü merang. Ano parnoki par Japan nunger shintu yimsüagi melaba ama par chuba (emperor ) külemdaktsütsü merang. Idangji tashir temetetertemji christianpur teyimba asünung parnoki anir item anema nokdak aser par lima ya tangar kübok malitsüla ta jembia apuso aser parnok nübu tajung aika Japan nungeri tepseta endok aser tepuokdaka aika ayu. Item ajunga ya angudang Korea nungertemi item christian purtem dak tangatetba aser shisatsü tajung aika lir aser linük asoshia parnoki tasü ita nokdaker ta ajiteta christian purtemji akhüm tsübu tenzük. iba ama teimtem tulu agi sünger alidang ano 2nd world war adok aser Korea ya tashi agi raksa-a timatem.
Iba war ya 1945 küm tema Japan surrender asü idangji Korea ya tiyongi sadanger alima ana aküm , North ya soviet union teyari ajanga communist lima ka aküm aser christantem talitsü mejungi aküm nung jentipur south koba democracy lima liasü aji bushia ajen.1950 nung ajungben north Korea-i south Koreaji amak aser jaka tulu ka atsünga ao aser idangji UN temelaba agir Ameriac-i anir UNO forces-i southji kümzüka ayu.iba ama timtem madak timtem ajurua aodang par alima ya tuküpoktiba jenjang-i ai aser nepurtem aser talisa tila tanürtem tsürapor suatoker talitak ki aser chiyongtsü maka aya agi sunger yimdong sunga nemzüa liasü aser jenti aya, tashidak balala aser tsüngküm arudang asük agi asü. Iba ama timtemdang ano sorkarji-a corruption agi sunga aküm anungji nepurtem atema tejenokdak mekai aküm aser idangya UNO member 120 dang liasü aser item ajak rongnungji South Korea ya ajak dang tesensaktiba linuk aküm iba mapangya missionarytemi nepurtem yaritsü apusu aser pei alidak shilem agia yaritepa aru. Tongtibang kaji par lima chiyongtsü adoktsüla ta parnok rongnung kar-i bilemteta aki aluyimba yimya agi masü saka scientific yimya agi alu ayimba tasah den krista osang külemi bener yimtsüngtem sema sayutsüngi den aluyimba yimya tasenji külemi sayua jajaya liasü.Iba yagi aluyimba aser tamangba na prongla nung renloka aotsü tenzük. Iba ama par lima tia ya angudang sepoy tanishir tesashi ka tenung agi Major General Park Chung Hee pai anir 1961 küm civilian governmentji atsüngtok aser pai aluyimba, industry aser education ajungaji temulong agaja yanglushitsü tenzük saka par linuk senpong tazüng asünung tetsükdaktsü olura liasü, idangji pai kanga temulong raksa-a,”ni ozü linukji sensaker ta meteta liasü saka iba tashi ya sensaker tabo memetet-e liasü” ta ashi. Anungji pai America den akang akanga tempar ayim aser America-i tiyari tulu agaja pai bilemba ama par linukji ajungketja yanglutsü tenzük. küsa mapang nungya bendanger missionarytemi teyari agatsüba den külemi school aser colleges aser universities jenti raksaa alibatem yanglushija ao aser item nungi züngtetertemji christian aika aküm aser parnokji office, industry factory business aser mapa balala ajak nung perokshi inyaka par lima tenzük aser par temulongtetba tulutibaji par lima ajungkettsütsü asoshi liasü.Parnok Japan nungeri kanga dang timtemdaktsü nung tejashiba tulu liasü aser mapa ajunga nung “Japan nungeri inyaktetba onoki kechiba meyinyaktettsü” ta suli merangli ta arudang par lima tejakleni kanga kara ao aser 1996 küm parnok develope country yongsuk-i ai.Iba ama küm 50 -60 tsüngta tesensaktiba aser tuküpoktiba tia nungi tematiba tia tongtetba ya tangalen kecha lima nung ataloka mali anungji alima ajunga-i kanga sungmanga liasü aser iba dang ya “MIRACLE OF THE HAN RIVER” ta ajar aser korea nunger aikati iba ya Tsüngrem nem dang tenung agatsür kechiba sura tetenzük nungi kristanpurtem aser christian missionarytemi anir shilem tulu agia linukji meima tenzüka aru ta ashir.
Christian yimsu tekeratiba aienba rongnung South korea ya ka lir aser la population ya crore 5.15 shi dang ( iba ya America nung state ana California aser Florida indang population den küsa lir, aser America ji state 50 agi aküm) aser yangji 30% jika christian, 46% tamangba kecha makartem (Atheist), aser tanüngba 24% ji buddhist aser tangatem lir. saka alimai missionary teyimtiba yokba rongnung America 1st aser South Koreaji 2nd lir, 1974 nung South Korea nunger arogotemi missionary 24 dang yoka liasü saka 2018 tashi nungbo 27000 dak tema bendanglima balala 170 tashi nung yoka teyinyakdak liasü. Iba ama parnoki par tejenba sobaliba koba agi nisungtem alena liasü aji toktsür krista yimsu temulong ajak agi mulongsua agizükba agi parnok moatsü ta jempir.Alima ajunga nung krista yimsu peroka züina aoba ya missionarytem timtema aser aiben pei taküm agi tenlaa kangshia dang krista osang peroka aru saka aisulen jangratema magizük. Korea nungbo missionarytem ajanga masü saka parnoki angashia bushi aser jangjaa angateter pela shishia agizük aser parnok sasa peroka tenzük.(Tamalen shia aliba 1603 nungi Yi Gwang Jeong-i anir).Tongtibangsa record sua aliba rongnung Korea nunger tamarener ka tenung agi YI SEUNG HUN french nunger catholic missionarytemi china nung peijing yimtiba nung 1784 küm baptitsü aser pai par limai oa par metemer tazünger aser tashir ishika baptitsüa tenzük. Tesulen telok balalai aiben samatsütsü merangaka iba milakji mesamai aru. Item ajakya angashia meteta arudang temulong-i tasüngdangba aika arur, asen naga nunger-a item nisungtem den tangatetba aser tamangba nung medemdangtsü koka lir na? asenok kechi tia nung ali? talisa asen Ao kin, asenoki tama krista yimsu agizük aser perokshi aser yamaji Tsüngremi küm aika asenok moaja arugo, maparen aser lenmang ajunga nung asen leniba sur aru aser bendanger kin temi asen dak rangloker akhum tsüpua liasü, iba tia to kechii ao, tanübo asen akhum tsüpuba O mangashir ato, aseni Tsüngrem amatok asü? asenok kong len jiyi?mesura mapang agi tonga aruba agi bendangertemi asen menepa aküm asü? Ano asen Naga nunger-a missionary mirjang ter to koleni ao? tasüngdangba onsara saka telangzüba tejangja mali, tanü asen Naga lima ya war tulu agi raksatsüba den küsa tiai yiatokogo, temzüng ozüng kecha maka, ochi maka aser nisung dak temeyim mali, aser auoer o nepur aser ozüng ayur tsüngta tebendang kecha mali, tashiyim agi pei sunuba sua aliba lima ka kümogo aser iba dak teküpokba tiabo aika malitsü suti, anungji asenoki nisung shia, kicha lokti aser arogotem ajaki iba ya aroka shisadangtsüla, talisa asen Ao kini krista osang aser tazüngba nung asen tama sur len ania aruba ama iba nungya-a asenokisa anir shisadanga tenzük nunga kota tajung sula ta nibo bilemer.