Nanded aser Varanasi nung PM-i MCC alema meinyak: EC

New Delhi, May 03 (Agencies): Hokolbarnü Election Commission (EC)-i Varanasi nung election nüboyim sentong nung jembidang Ato kilonser, Narendra Modi-i model code of conduct (MCC) alema meinyak, ta metetdaktsü.
EC-isa, Maharashtra kübok Nanded nunga Ato kilonseri pa onük ajanga MCC alema meinyak, ta oshidang agütsü.
Ibaji densemabo tang tashi nung EC-i Congress-i Modi anema tashishiba ken o agütsüba pongu nung Modi maitsür.
Tanü EC-i, “April 6 nü Nanded nung Narendra Modi-i onük ajembidang EC tetuyuba aser Model Code of Conduct alema inyak ta ashishiba sülen Chief Electoral Officer, Maharashtra nungi osang tejangja meshi. Iba onükji EC-i tejangja reprangshiogo aser pai item ozüng alema inyakba kuli mangu,” ta metetdaktsü.
Ano April 25 nü Varanasi nung Modi-i onük jembiba osang tejangja Chief Electoral Officer, Uttar Pradesh dang nungi meshi, ta EC-i metetdaktsü.
“Iba onükji EC-i Model Code of Conduct ozüngtem den medemdanga reprangshiogo, aser iba onük nung ozüng alema inyakba kuli mangu,” ta EC-i metetdaktsü.
Varanasi nung election nüboyim sentong nung jembidang Modi-i linük security atema jembia liasü. Kiralongrartemi Pulwama amakba sülen Air Force-i Balakot amakba tetshia Modi-i, tangbo kiralongra anema raraba nung alimai India pusemer, ta jembia liasü.
Rajasthan kübok Barmer nung Modi-i sepaitem tetshiba atema Congress-i tashishiba ken o agütsü, ajisüaka yashi EC-i Modi-i MCC alema meinyak, ta oshidang agüja liasü.
Iba dak alia April 1 nü Wardha nung election nüboyim sentong nung jembidang Modi-i Congress Tir, Rahul Gandhi-i minority (Muslim) nunger timba aliba Wayanad menden nungi toktepba atema aija liasü. Modi-isa tang mezüng vote agütsütsüpurtem dang Balakot amakba nüngtem nung vote agütsütsü mepishi aser April 9 nüa Latur nung Modi-Pulwama nung taküm bendanga agüja asür sepaitem nüngtem nung vote agütsütsü mepishia liasü, ajisüaka item onük nung EC-i Modi maitsü.
Brihostibarnü Supreme Court-i EC dang Congress Party-i Ato Kilonser aser BJP Tir, Amit Shah nati election MCC alema inyakogo ta ashishiba ken ajak atema May 6 tashi nung oshidang agüjang, ta tuyuba sülen tang tashi nung EC-i ken o pongu atema oshidang agütsüogo.
Congress Lok Sabha MP, Sushmita Dev-i, parnoki EC nem tashishiba ken o 11 agütsü; ajisüaka EC-i ken o ana atema dang telemtetba agütsü, ta Supreme Court bench nem metetdakja liasü.