Gadchiroli amaktsü tasa atongsang jangjaogo

Mumbai, May 3 (Agencies): Bodbarnü Maharashtra kübok Gadchiroli nung Naxal temi bomb amshia amakba nung tongti tasa atongsang jangjaogo.
CPI (Maoist) nung North Gadchiroli unit indang chief commander Bhaskar-i iba tasa atong.
May 1 nü iba lendong nung Quick Response Team (QRT) commando 15 aser nija gari driver ka asü.
Bhaskar ya tesüiba küm 15 tashi mapa inyaka arur aser police-i pa apur nem sen lakh 16 senpet agütsütsü nangzüka lir. Par unit nung züngsem ka Nagsu (Mansu/Girdhar) dang iba improvised explosive device (IED) ayutsü atema mapa nungloktsü.
Iba lendong nung asürtemji police constables (PC) Dayanand Sahare, Aagraman Rahate, Sarjerao Khade, Kishor Bobate, Santosh Chavan, Raju Gaikwad, Laxman Kodap, Sahudas Madavi, Nitin Ghormare, Puranshaha Duga, Pramod Bhoyar, Touffik Shekh, Amrut Bhadade, Yogesh Halami aser Bhupesh Valote nungertem ta jangjaogo. Maneni nija driver ji Someshwar Singhnath Kurkheda liasü.
Ghonda 24 tsüngda Gadchiroli nung Naxal temi anaben tashi amak. Mongulbar aonung Naxal telungpurtemi gari 50 dak tema rongdoktsü aser iba tesemi aodang QRT commando temji len tom nung amak.