Cyclone Fani ajanga Odisha nung nisung 6 asü: Tanü NE atongtsü

New Delhi, May 3 (Agencies): May 3, 2019 nü Odisha kübok Puri nung Cyclone Fani süiba ajanga teraksa jenti bentsür arutsüba den nisung 6 tashi asüba osang angazüker.
Tanep 8:00 ako meta Cyclone Fani Puri atong aser iba mopung tesashi ajanga kiojen aika ondoktsüba den tzünglu tashii aruba ajanga tesem aika metsüngbang.
Tasürtem rongnung tanur tebur ka süngdong laoa anenset, tantsür ka lung agi onset aser relief shelter nung tantsür ka taoksa nung temulungjang timtem adoka asü.
Cyclone Fani ajanga timtem agütsüba state tem yaritsü atema sen crore 1000 dak tema lemzüktsüogo ta Hokolbarnü Prime Minister Narendra Modi-i metetdaktsü.
Odisha tzükümlen süiba sülen Cyclone Fani ya West Bengal aser Bangladesh tsütsü süitsü ta Regional Meteorology Centre (RMC)-i metetdaktsü.
Fani yagi Northeast tsütsü kanga kongshitsü aser tesem aika nung tzünglu kanga arutsü ta RMC ajanga ashir.
May 4 aser 5, 2019 anogotem Cyclone Fani ya Northeast tsütsü aser talisa West Assam aser Meghalaya kübok Garo Hills tesemtem süitsü aser iba mapang mopung tesashi den tzünglu kanga arutsü.
May 5 nü Cyclone Fani ya West Assam aser temeket süitsü aser iba tasüng nungi tzünglu aruba anentsü. May 5 nü Arunachal Pradesh, Assam-Meghalaya Meteorological Sub-divisions aser Nagaland nung tzünglu arutsü, ta Central Water Commission (CWC)-isa metetdaktsü.