JCPI-i ayongba senden nung dendaktsünür

Dimapur, May 14 (TYO): May 18, 2019 nü JCPI-i senden ka amentsü ayongba nung kin 16 hohotem, lokti balala aser CSO lennirtem arua adentsü mepishir, ta Joint Committee on Prevention of Illegal Immigration (JCPI) ketdangpurtemi metetdaktsü.
Sendenji Tourist Lodge hotel, Dimapur nung alitsü aser lennirtem mazüngi dang liaka aser lenmang majungba ajanga Dimapur tashi senzüsenbongtsü asoshi timtem ajuruaka, lokti ajak nungi tir aser tongti tezülurtem ajak iba senden nung arua adentsü mepishir, ta JCPI Convenor K. Ghokheto Chophy aser Secretary Tia Longchar nati sangdong ka nung ashi.
Senden nung ILP/BEFR aser CAB onüktem benoka jembitsü, ta tenatisa metetdaktsü.
JCPI ya kin hohotem aser tongtipang teloktemi August 8, 2018 nü tentet. Tesüiba küm ka shi kin balala lennirtem aser teloktemi nungloktsüba ama committee-i nendaka inyaka arur. Ajisüaka, lia arudang onük aika adoka lir aser itemji benoka lemsateptsü nüngdaker. Maneni, iba senden nung committee-i lennirtem dang mapa inyakba aruba osang lemsatepnür, ta JCPI ketdangpurtemisa metetdaktsü.