Tamangba yimsüibo temeim sayutsüla

Alima nung koba tamangba yimsü südir süaka mapa tajung inyaktsü aser tangar dang meimtsü indang sayur. Tamangba yimsü shia jagi ajak madak kibur Tsüngrem ka lir ta amanger aser iba kibur Tsüngrem  jagi alima nung nisungtem dang tamajung madak tajungi akoktsü ajungshir. Aji oda, tanü putu nunga tamangba yimsü kari danga tangar tamangba yimsü amangertem taküm samatsütsübaji Tsüngremi mulungba mapa ka ama inyaka lira, itemji tangatetba tai leni aortem asütsü. Tanü item ama pei amangba tamangba yimsü tenüng nung alima tesem aika nung nübortem  anema tetsübutsü kiralongra mapa inyakba angur. Item rongnung taoba ita Yisu shia aruba anogo bilemtetba mong Easter anepdang Sri Lanka nung Khristan-tem tenla kidang tekülem mapang agia alidang pei mang agi bomb kümer aruagi pokloktsüba lendong agi tang tashi Sri Lanka mesüngjemteti lir. Iba lendong ya Khristantem anema Muslim nunger kiralongrar telok ka tenüng agi Islamic States purtemi inyak ta metetdaktsü. Ibaji dang masü saka ano Sri Lanka government-ibo Easter anepdang tai maketba Khristan pur 200 dak tali pokseta südaktsüba aser nisung 500 dak tali yirutsüba lendongji Sri Lanka nung aliba  National Thowheeth Jamaath (NTJ) teloki inyak ta tonglokja lir. Koba teloki südir süang iba mapaji Muslim nunger telok kati Khristan purtem anema inyakba mapa ka lir. Ibaji jungjunga bilemdangra, kecha tajangzük makaba mapa ka nung pei taküm dena tenla agüja kiralongraba mapa inyaktsüsa sayurtemji alima nung tanüngba taküm alirtem asoshi kanga lendong tulu asütsü. Atangji, kiralongraba mapatem ya Muslim nungertemi dang masü saka tanga yimsü amangertemia inyaker. Aji oda, alima tesem kar nungbo Khristan-temia tanga yimsü amangba purtem dang Yisu temeim sayutsü melen kiralongraba mapa inyaka alitsüa akok. Kasaji, ano India lima ama nunga Hindu nungertemi tanga yimsü anema tashiyim mapa inyakba tesem aika nung atalokba asenoki angashir. Iba amaji kodang tamangba yimsütem rongnung kati ka kümzüktsü aser yariteptsü merangtsü melen samatsütsü merangdir, tamangba yimsü agi tepela aser yimjung bener arutsü melen kiralongraba mapa aser rara manentsü. Tanü putu nung alirtem asoshi tia maka atalokba kaji tamangba yimsü tenüng nung kiralongraba mapa inyakba ya asütsü. Joko, koba kuli agi südir süang, Muslim nunger telokbo Mulsim nunger telok asünungji, Sri Lanka nung tanga yimsü amangertemi ano Muslim nunger alidak tekülemdak makyong aobaji Muslim nungertemi inyakba dang nungi tamajungba asütsü. Mangyangba agi tamang jenjang atutsüba masü saka takoksa aser tesasatsüba tia dang tuluba ajurutsü. Muslim nungertem tekülemdak dena makyonga aobaji Khristan purtem asü nungbo, iba mapaji Yisui memulungba ama asütsü. Atangji, kiralongrartem bushiba aser apuba mapatem nungbo arogoi dena tebang ia sashia inyaktsüla, kechiyong alima sünepa alitsü atema yimtenia temzüng ozüng akanga amshitsü nüngdaker. Tamangba yimsü külemer ajaki teyanglur Tsüngrem külemer asünngji, Tsüngremi mulungba mapatem dak alaka tanga inyaktsübaji Tsüngrem dak amanger memesük asütsü. Atangji, tamangba yimsü balala amangertem rongnung kati ka akümtsübutepa meimtepa alitsüba dak alaka, onok alidakbo tanga yimsü amanger melidaktsütsü aser chiyongtsü nunga dena onoki machiba chiyongtsübo mechidaktsütsü ta nokdangra, alima nung alirtem asoshi tali tasak asütsü. Tanü India tesem aika nung tamangba yimsü tenüng nung  nashi melepdaktsüba aser nashi shi bener mesenzüdaktsüba mapatem yagi India nunger tamangba yimsü balala amanger süaka kati ka akümtsübutepa meimtepa alitsü melen meputep, temulung melemtep aser tsükchiteptsü ajungshir amai kümogo. Iba amaisa ao nungbo, alima mesüngjemtettsü aser India lima ama yabo tamangba yimsü tenüng nung linük telongjem loksaa aotsü. Ashiko, idangjibo Khristan state, Muslim state, Hindu state aser Sikh state ta India telongjem kübok nungi state balala razüka ao tenzüktsü. Ibaji matalokdang, India nung tamangba yimsü ajak sademsadema tetsübu tarendak melii amanga aser aremzüktepba litettsüsa alima tajungba aser tesademba ka küma yanglutsü nüngdaker.