NBCC nung affiliate süa aliba school tem nem tenüngsang agütsü

Dimapur, Monupii/May 14 (TYO): Nagaland Baptist Church Council (NBCC) nung affiliate süa aliba kaket rejutem nungi HSLC aser HSSLC tatidang nung temaba jenjang nguteter nem tenüngsang agütsüba sentong ka May 14, 2019 anogo Platinum Hall nung ayongzüka agi. Iba sentong nung Menukhol John, Principal Secretary, School Education and SCERT ya guest speaker liasü. Temaba jenjang nung takok angurtemi parnok taküm nung nükjidong ayuba lemsatepba asoshi Menukhol John-i nenshia ashi aser lanuwa nung Tsüngrem agizükba asoshi pelaba ashi.
Iba sentong nung temaba jenjang angur parnok ter (HSLC nungi trok aser HSSLC nungi parnok pezü) nem sempet agütsü aser sarasademja liasü.
Parnok rongnung kaketshir ti-i takok anguba otsü lemsatep aser taküm nung parnok nükjidong lemsatepa liasü. Parnok rongnung nisung ana iba sentong nung medentet saka parnok melen kinungertem arua dena liasü. Temaba jenjang angur ajaki Tsüngrem nem tenüngsang agütsüba, tsüraburi yariba, meranga inyakba aser mapang shidak amshiba indang lemsatepa liasü.
NBCC general secretary Rev Dr. Zelhou Keyho-i kaketshirtem takok asoshi Tsüngrem nem tenüngsang agütsü aser parnok tarutsü wadang asoshi sarasademja liasü.