Tanurtem kümzüka ayutsü indang sentong ka agi

Kohima, May 15 (TYO): Bodbarnü Nagaland State Legal Services Authority (NSLSA)-i “Child Protection: Towards Collective Action” indang sentong ka ayongzüka agi.
NBCC Platinum Conference Hall nung ayonga agiba sentong nung tongti tesemdangerji Gauhati High Court nung Judge, Justice Songkhupehung Serto liasü.
“Linük nütsüng yongsük nung shilem 20 ji arishi küm 17-18 tsüngdapurtem lir aser parnok ya kanga dang tongtipang telok ka lir kechiyong parnok ya linük asoshi tarutsü putu lir” ta Justice Serto-i o jembidang ashi.
NSLSA-i tanurtem kümzüka ayutsü atema sendaktepa alirtem ajak sabang ka nung anidenba atema tenüngsang agütsür. Parliament-i tanurtem kümzüka ayutsü atema ozüng aika yangluogo anungji asenoki tanurtem kümzüktsü atema tebilemtsü bena inyaktsüla, ta paisa ayongzük.
Tanü sentong nung Justice Serto-isa “Mega Legal Services camp: From awareness to empowerment” ta ser NSLSA magazine sayatsü.
NSLSA-i National Legal Service Authority’s Child Friendly Legal Services to Children and their Protection) Scheme, 2015 kübok tanurtem yaritsü aser parnok kümzüka ayutsü atema bendanga agüja inyaker, ta NSLSA member secretary Mezivolu Therieh-ia ashi.
Tanur ka atema lendong nungi jenbua alitsüba tesem tajungtibaji pei indang ki lir ta züngshir. Ajisüaka tanü putu nungbo pei kidanga jenbua melittsüsa tensa ajurur. Anungji asenoki tanurtem kümzüka ayutsü atema osangtem prokshitsüla. Nagaland nung tanur dak tashiyim mapa inyakba kanga bulua ataloker anungji sendaktepa alirtem ajaka tanurtem kümzüktsü atema inyaktsü nüngdaker, ta Therieh-isa metetdaktsü.
Tanü sentong nung technical session mapang IGP (Range) Sonia Singh-i “challenges and role of police in combating child protection” onük jembidang “tanurtem dak tashiyim mapa inyakba 80% ji kinungertemi inyakba lir” ta ashi.
Nagaland nung tanurtem ta asübaji küm 0-18 tsüngda alirtem dang ajar aser parnok ya state nütsüng yongsük nung 39% lir. Asenoki mapang shitak nung FIR mebenokba aser tashiyim inyaker nisung memetetdaktsüba ajanga medical kulitem menguteter, ta laisa ashi.
Sentong nungsa State Panel Lawyer Limhathung Ezung-i tanurtem dak sendakba ozüngtem indang lemsatep aser Collab Director, CHILDLINE 1098 Dimapur, K Ela-i lai tanurtem atema inyaka arudang ajangshiba kar metetdaktsü.
Maneni, Senior Programme Coordinator, Childline India Foundation Kolkata, Avik Mitra-i “Understanding Child Protection – issues and strengthening the Services available for Child Rights” aser Clinical Psychologist and founder The Could Room, Themmungla Raman-i tsürabur aser tanurtem indang counseling onüktem jembi.