Mahatma dang ‘Father of Pakistan’ ajaba atema BJP-i Anil anentsü

New Delhi, May 17 (Aegncies): BJP otongdar, Anil Saumitra-i social media post nung, Mahatma Gandhi ya “Father of Pakistan” ta ajaba atema tanü BJP-i pa party nungi anentsüogo.
BJP-i pa party primary membership nungi anentsü.
Facebook post ka nung jembidang Saumitra-i, Gandhi ya ‘Father of Pakistan’ lir, ta ashiba den külemi pai, India nung Gandhi ama nisung crore aika asor, ajisüaka kar tagila aser karbo tagidak maka, ta metetdaktsü.
Madhya Pradesh BJP unit tongti, Rakesh Singh-i iba atemaji bushisüngdanga liasü aser Saumitra dang anogo tenetnü tsüngda telangzüba agüjang ta metetdaktsü.
Pa ya BJP media relations department nung tongti lir.
Tawa BJP lenirtem aikati Mahatma Gandhi tepsetsang pusema Nathuram Godse nem tenüngsang agütsüba ajanga tashishitep ken o tulu adoka aliba mapang nung Saumitra-ia iba o ya jembi.
Brihostibarnü Nathuram Godse pusema Union Minister Anantkumar Hegde-i twitter ajanga, küm 70 sülen tanü nüburtem tangatetba melenshir, ta metetdakja liasü.
Paisa, ibaji ajanga aija alirtem ken o angadangtsü atema lenmang lapoktsür, ta ashi.
Hegde-isa, iba ama onük ka nung o toktepba ajanga Godse-ia pelar lila, ta ashi.
Ajisüaka Hegde-i, pa indang twitter account kari ‘hack’ asü aser pai Godse indang tweets agienogo, ta metetdaktsü.