Godse tenüng asangba atema Pragya dang tai matoktsü: Modi

New Delhi, May 17 (Agencies): Hokolbarnü Ato kilonser, Narendra Modi-i, BJP candidate, Pragya Singh Thakur-i Mahatma Gandhi mezüngmeshia pa tepsetsang, Nathuram Godse ya linük meimer ka liasü, ta jembiba atema la dang tai matoktsü, ta ashi.
May 19 nü Lok Sabha election shilem tatembangbuba agitsü atema nüboyim sentong tatembangbuba anogo nung TV channel ka den jembidang Modi-i, Sadhvi-i jembiba oji loktiliba yirutsütsü o lir, ta ashi.
“Gandhi mesüra Nathuram Godse indang jembiba oji kanga majung aser loktiliba atema kanga tai. Lai tatok meshiogo ajisüaka ni la dang kodanga tai matoktsü,” ta paisa metetdaktsü.
Hokolbar anepdang BJP National Tir, Amit Shah-ia, Mahatma Gandhi tepsetba indang BJP lenir asem- Thakur, Union Minister Anantkumar Hegde aser Karnataka MP, Nalin Kumar Kateel nungeri jembiba oji party tangatetba den sendaktepa mali, ta metetdaktsü.
Shah-i, party disciplinary committee-i parnok dang anogo 10 nü tsüngda telangzüba agüjang ta tuyuogo, ta metetdaktsü.
Madhya Pradesh kübok Agar jila nung roadshow ka nung jembidang Thakur-i, Nathuram Godse ya linük meimer ka liasü aser linük meimersa asütsü, ta jembia liasü.
Tesülen lai jembiba o atema lai tatok meshi.
Lai jembiba o ajanga tashishitep tulu adokba mapang nung Karnataka nungi BJP MP, Nalin Kumar Kateel-ia Godse ya taoba mapang Ato kilonser, Rajiv Gandhi den medemdanga jembi.
Yashi Kateel-i twitter ajanga, “Godse-i nisung ka dang tepset, Kasab-i nisung 72 tepset aser Rajiv Gandhi-ibo nisung 17,000 tepset. Shiba tamajungba liasü nai shisadangang,” ta metetdakja liasü.
Union Minister, Anantkumar Hegde-ia Godse pusema jembi ajisüaka tesülen paia tatok meshiogo.