NDPP tenteter küm 2 jungogo

Dimapur, May 17 (TYO): May 17, 2019 nü Nationalist Democratic Progressive Party (NDPP) tenteter küm ana ajungba anogo amung.
Sentongji “Nousi” Auditorium, Niathu Resort Chumukedima nung agi aser NDPP president Chingwang Konyak-i anir züngsemtem aden.
Sentong nung mendenji NDPP Women Organisation President, Ms. Visevonuo Bebi liasü aser Yimchunger Baptist Church Dimapur Pastor, Athsan Yimchunger-i temoatsü meshia sarasadem.
Sentong nung NDPP Working President Alemtemshi Jamir-i okila jembidang “President, Secretary General aser party tenzükertemi meranga inyakba ajanga iba party tentet. Maneni küm ana tashi len anir aruba atema Tsüngrem nem tenüngsang agütsür” ta ashi.
NDPP nung ‘Democratic’ olung dena lir aser iba ya kanga tapet lir kechiyong democracy indang tera ya Khristan tangatetba nung yanga lir. 1500s mapang Martin Luther King-i anir temelenshi bener arutsü inyakba ajanga democratic inyaksangshi adok, ta paisa ashi.
NDPP President Chingwang Konyak-i tir o jembidang “NDPP züngsem ajaki bendanga agüja inyakba ajanga tesüiba ana tsüngda tashitaitba küma arur aser iba atema tenüngsang agütsür” ta ashi.
“NDPP anemertem liaka NDPP-i 2018 nung sorkar akümtsüsa Tsüngremi mapang temoatsü agütsü. Iba sülen 26 Aonglenden assembly constituency indang by-election aser ano 2019 general election nung opposition temi NDPP anema longjemba ajanga asenoki khuret tulu ajuru saka asenoki meranga inyakba ajanga asen candidate temi takok angutsü” ta Chingwang-isa ashi.
“2018 elections nung NDPP-i aniba PDA sorkari takok angudang nübortemi mamangtet. Mapang tatsüka tsüngda NDPP-i takok tulu angudang nübortem süngmangtep. NDPP ya inyaksangshi nungbo regional saka tereprangtsübo national lir,” ta Secretary General Abu Metha-i o jembidang ashi.
NEDA aser NDA nung yaritepba ajanga küm ana tsüngda NDPP-i national jenjang tongtetogo. Chief Minister Neiphiu Rio ya linük nung Chief Minister tejentem rongnung ka ta züngshir. Prime Minister-i Varanasi nung LS elections atema nomination asüdang jaokba ajanga asenoki iba kuliji angur, ta Abu-isa metetdaktsü.
Tesüiba küm ka ketdangsüa arudang NDPP-PDA-i mapa aika inyaktetogo aser item rongnung state yimtiba adena orr Kiphire nung mezüngbuba Cabinet senden amenba ka lir. Iba senden nung Union Minister of State for Home Kiren Rijiju-i alakteta jaoker ka ama arua shilem agi, ta paisa ashi.
NDPP ya democratic party ka lir anungji iba party nung dennürtem asoshi kishi lapokja dang lir, ta Secretary General Abu-isa metetdaktsü.
Sentong nung NDPP Youth Organisation president Kelhouneizo Yhome aser MLA & Advisor Mr. K. T. Sukhalu natia o jembi.