Asenoki mejanatsüla

Tanü alima nung tzü mopong menendaktsüba ajanga asenok timtem ajuruba indang kanga jembir aser asenokia metetter, ajisüaka asenok aikati alima tzü mopong merüktettsü atema nia kechi inyaktsüla ta aiben meshisadanger. Atangji, alima tzü mopong menendaktsüba ajanga alima tatsükba akümba, tzümetsüng aser yipru lendong tali atalokba aser tashidak tapu balala poktetba ajanga nisungtem timtem takoksa ajuruba asenoki angur aser metetter. Ajisüaka, asenokbo tia ajung item alima lendong agi kanga sashiabo memeneper, anungji asenoki tebang agi jembiaka shishia mebilemer. Aji oda, kodang asenoki alima tzü mopong menendaktsüba indang jembidir, iba mapa nungji asenokbo maden aser asenokibo tzü mopong menentsüsabo kecha meinyaker amai bilemer. Ajisüaka, alima tzü mopong menentsüsa inyakba tai nungji asenok nisung shia dena lir. Tilatiba agi, asenoki asen kidang amshiba plastic pongdangpongri aser dokan nungi kechsarina seper bener aruba polythene yangkutem mashimashi nung endoker. Asen kidang azüngtetba pongdang aser polythene yangkutemji asenoki asen lima dang masü ano tangar kiyong nung tangar kima bener oa endoker. Ano, asenok aikati itemji ayong nung aser longpanglongren nung gari nung oshir oagi endoker. Tesem kar nungbo yimteni dena yamaji tang tashi inyakba angur. Asenok tang tashi asenok süoshi tajung agir gari tajung nung senzüaka, tangar mesüka nisung makümba tamaitsü kaji, yimti yimdong ajanga süidang gari telong nung kechisarina achiba polythene aser mica agi yangluba pongdangtem, tzü ajemba plastic bottle aser süngjanglijang tzü ajemba yin pongdang ajak gari telong nungi yimdong janatsüsa mashimashi merepshia jajar. Iba amaji asenoki inyaka jajabaji asenoki asen yimti yimdong janar ta memeteti inyaker asütsüa akok. Tangar temetetetter aser tangatetter lima nungbo yimti yimdong nung polythene aser plastic pongdangtem mashimashi endoka jajatsübaji taaktsüka aser ozüng raksaba mapa ka asütsü. Item yimtitem nungjibo yimdong nung kaket tilaka endok nunga süng police-temi arua pur temerenshi agitsü. Iba amaji tangar yimti yimdongbo janatsübajibo yutsür anepdang shia tzü agi shidoker. Atangji, meilongi asenok rongnunga alima tzü mopong kümzüka ayutsü nüngdakba indang jembi tenzükogo aser tesem tesem nung lanurtem longjemer yimti yimdong dang masü saka ayongtem nunga nisungtemi polythene, mica aser plastic aser yin pongdang mashimashi endokba agi joko tenem küma nangdena alibatem bendena merüktettsü tenzükba mapa tajungtem angur. Temetettertemi ashiba agi, potato chips chir asenoki iba asepba mica pongdangto tesem mashi ka nung endoktsü aser itemji meilongi ali agi nembangtsü mesüra ayong aser tzüyim telongi aitsü aser item tesem nungji item mica pongdangtemji küm 500 bo shitak alitsü. Ibaji kodang asenoki jungjunga bilemdangdir, tanü asenoki alima ajungtsü indang junga mebilemdangi mashimashi endokba mica aser polythene-tem jagi ali, ayong aser tzüyim telongtem ajak nembanga ayutsü aser item tesemtem nung aliba taküm aika samatsü. Kodang asenoki alima tsüka akümba indang jembidir, asenok kanga shisabolutsüla, kechiyong alima kanga tsüka kümra, alima nung kecha meyitsü aser züsentsü makoktsü. Iba amaji kodang alima nung atalokdir, ayawara arutsü aser tashidak tapu balala poktettsü ta alima nung nisungtem tali majungtsüsa atalokyonga aotsü. Atangji, alima tzü mopong menena akümba yabo alima kintem arok tebilemtsü lir saka tzü mopong merüktettsübajibo alima kintem ajak adenshir külemi inyaktsüba masü saka asenok nisung shiai asen alidak pei akok mapa tilaka nung shilem agira, iba jagi mapa tulu küma alima merükteta kümzüktettsü. Asenoki mapa tuluka meinyaktettsüa akok saka asenoki asen alidak aseni amshiba plastic tzü bottle, kechisarina asepba mica aser polythene agi yangluba yangkutem mashimashi nung meindoktsü tenzükra, iba kisüng jagi alima mesamadaktsüi tarutsü chirnurtem asoshi alima tajungba ka yanglua yutsütsü merangba mapa nungbo shilem tuluka agir asütsü.