Exit Polls ya Exact Polls masü: Venkaiah Naidu

Amaravati, May 20 (Agencies): India Tatong Tir M Venkaiah Naidu-i Deobarnü ‘exit polls’ luja jembidang iba ya ‘exact polls’ masü ta ashi.
“Exit polls ya exact polls masü. Asenoki ibaji angatettsüla. 1999 nungi exit polls teimbaka tai liasü” ta Naidu-i ashi.
Tan general elections indang olen ka jembidang “party ajaki takok angutsü ta tamang akaba jembir. Party ajaki May 23 tashi tashi yamaji jembitsü. Ajisüaka, iba nung tamendakdak kecha mali anungji asenoki May 23 nü atadi” ta paisa ashi.
Linük aser state-i lennir tajung aser sorkar takang nüngdaker, shir adokdir adokaka, ibaji dang nüngdaker, ta Naidu-isa shisem.
“Democracy tashi itdaktsütsü süra, langka tajung ka adoktsüla. Election, candidate, party temi pei teinyaktsü shitak inyaktsüla aser timi inyaktsüla, ta Tatong Tir-isa metetdaktsü.
“Tanü yimtenren sabang topur majung kümogo. Political lennirtemi o jembidang mebilemdangi jembir. Parnok o parnok na nija dak sendakba onüktem nung tai tongloktsüteper. Politics nungbo tetoktepertem dak alaka tsükchir mali saka parnoki iba chichiba ochi ya amadokogo” ta Naidu-isa ashi.
Parliament nung MP tem aser Assembly nung MLA tem indang yimya reprangdangang. Parnoki yimya tamajung benshir aser kasaji Panchayat o civic bodies ketdangpurtemi jilu benshir” ta paisa shisem.
“Political party temi vote enoktsürtem mesüzüktsü atema teyari agütsütsü nangzükba ya tai lir. Nenok nem küm pungu ketdangsüba agütsüba tetezüji nenoki mapa inyaktsüla. Nenoki yamaji meinyaki, tatembangba minute nung ang teyari agütsütsü mesüra langka inyaktsütsü ta ashibaji tim masü. Nibo iba tangatetba anema noktaker. Angati tashi anguba tetezüji tashi mali” ta Naidu-isa metetdaktsü.