Zubeen Garg-i ULFA-I dangi shidi zülu

Guwahati, May 20 (Agencies): Assam nung nüngtugu kentener Zubeen Garg-i tanü United Liberation Front of Assam, Independent (ULFA-I) dangi yimjak nung shidi ka zülu aser iba nung yimjung atema ayongzüka lir.
May 15, 2019 nü Guwahati nung bom pokdaktsüba atema ULFA-I-i tenüng agiba osang metetdaktsüba sülen Zubeen-i iba shidi zülu.
CRPF patrolling party aser SSB dak tenük yoka iba mapa inyak, ta ULFA-I Commander-in-Chief Paresh Baruah-i osangbener dang ashi.
Iba dak sendakba nung Assam police-i nisung pungu tashi pua lir.
“ULFA dang ni temelenshi ka aginür ta ashir. Tai maket nisungtem tepsetba ajanga tejang tajung matangtsü. Tetsüba agi linük ka meyangertettsü, saka meranga inyakba agiang yangertsü akok. Asen tanurtem dang mapa inyaktsü sayuang. Parnok dang metsü proktsü sayuang. Parnok tarutsü yangertsü sayuang. Nenoki langka yanglunüra, Majuli yangluang. Nenoki langka samatsünüra, Kaziranga nung lendong bentsür arurtem samajang” ta Zubeen-i Facebook nung metetdaktsü.
Iba shidi atema Assam nungertemi Zubeen tenüng asanger aser parnoki yimjung tensa meraksatsüla ta ashir.
“Ni kiralongraba magizüker aser iba anema rarar. Kiralongraba ajanga asen temetentem asoshi kecha bentsür marutsü, ajisüaka shisaluyimba ajanga dang bentsür arutsü. Ni yimjung aser mapa inyaktsü ajungmesor ka lir. Asenok ajaki mapa inyakdi, asenok ajaki alizüng yudu, asen chirnurtem yimjung nung indaktsütsü” ta Zubeen Garg-isa ashi.