Tangar ki meraksatsütsüla

Alima nung taküm alirtem ajak ya pei ki kaka lir. Pei kiji kar atema azü aser süra ki, kar atema long ki, kar atemabo tesep, ano kar atemabo lungki, kar atema tzü aser kar atemabo arem mein lir. Kechi komala ki südir süang, tangar ki dang nungibo pei kisa tajungba aser ani tesüngzükba, kechiyong itemji Tsüngremi pei nüngdak yari moatsüba tejenokdak aser anisüngzükdak tesemtem lir. Ibaji angateta alima nung taküm alirtem rongnung kati ka akümtsübutepa aser yaritepa lira, idangjibo bendangertem ozüng alema tangar lima nung oa alitsü tenzükba tebilemtsü malitsü aser shirurutemia nisung alidak bushia oagi timtem magütsütsü. Yakanü Dimapur Government College nung alima tsüka akümba tebilemtsü onük nung shisatokden sentong ka akadang, shisalen teyurtemi ashiba ama, arem ya shirurutem talidak ki lir, anungji kodang asenoki arem maka kümdaktsüdir, shirurutemji talidak makatsü aser süngdonglidong malinungji parnok alidak tesemtem nung tzü roseptsü aser mopong tatsükba akümtsü. Anungji, shirurutemi tejenokdak tesem tajung aser temekong bushia nisungtem alidaki arutsü. Tanü tesem aika nung nisungtem alidak tonga arem shirurutem aruba ajanga nisungtem timtem ajurubaji shirurutemji tai masü saka asenok tai lir. Asenoki parnok ki raksatsüba agi parnok jenokdak bushia adoker. Shisalen teyurtemisa ashiba ama, alima nung taküm alibatem ajak ya kati ka dak metaloktepa taküm alitsüsa Tsüngremi yangluja lir. Tatishitsü tilaka, koyai alu aser jendang tsük chitsür aser kidanga chiyongtsü ayu majung chitsür alir, ajisüaka asenoki kodang koya ya mali küma samatsüdir, asenok kidangi chiyongtsü bushia per arutsü. Merilai asenok dak meteper aser shirangdaktsür saka kodang asenoki merila ajak tepsetdir shiruru kar atemabo chiyongtsü makatsü. Iba amaji kodang asenoki arem nung shitsü mesü ajak kasetdir, idangjibo keyi yimtaki adoka nashi nabong achi tenzüktsü. Iba amaji, talidak dang masü saka kodang asenoki tangar taküm alirtem asoshi mebilemdangi chidiyongdidir, tatem nungbo asenoksa akoksatsü. Iba kasaji nisungtem rongnunga ataloker. Tanü Nagaland nung Bangladesh nungertem ozüng alema aruagi asen lima nung ali tenzükba tebilemtsü indang asenoki jembir. Asenoki jungjunga bilemdangra, iba timtemji asenok dak nungi tenzüker. Atangji, asenoki asen lima nung asenok nüngdak mapatem inyak mashi aser ashiyonga meinyakner, anungji asenoki parnok nüboji bushia anir arur. Ajisüaka, Bangladesh nungertem asen lima nung nungokba kuliji aji dangbo masü. Parnok asoshi tebilemtsüji par lima nung parnok alidak tesemtem aika joko tzüyim tzü agi atsüngbangdi asür, kechiyong alima tsüka akümba agi rüjep agi tenem küma alibatem yangsaa aor aser itemji tzümetsüng kümer tzüim nung yimoker. Tang ya asenok ajaki asen lima nung alima tzü mopong meraksai kümzüka ayuba nung shilem tulu magitetra, küm ishika tsüngda Bangladesh ya tzü agi atsüngbanga adoktsü. Ibaji meteta tang yongi tzüyim tzüküm anasa alirtembo item tesemtemji toktsür talidak tesem tasen bushia aor. Item rongnungji Northeast Indiai arurtem ya dena lir. Parnokji teimbaka Assam aser Nagaland nung jenoker. Aji oda, par lima nung dang masü saka Bangladesh meküta aliba alima kintemi arem samadaktsüba, plastic agi yangluba osettem mashimashi nung endokba aser chiyongtsü lalushipong tali asüba ajanga tzü mopong tali tatsükba kümer, tangbo tzü atsünga atuba agi parnok alidak yim ajak toktsür tangaleni aotsüsa kümogo. Iba amaji mataloktsü atema asenoki tzü mopong mekonga kümdaktsütsü asoshi pei kidang aser mapa inyakdak ajak nung timtem arema temulung agüja inyaktsüla. Asenoki yangi asen alidak süngdong ka atemba ajanga aser plastic mamshiba ajanga Bangladesh nunger tzüyimküm nung alirtem asoshi kecha tebilemtsü maka talitsü tzü mopong tajungba kümra aser tzüyim nung akhi ama tzü arema lura, asenoki arung asüyonga parnoki marutsü, kechiyong taküm alir ajak atema pei ki tetka maka.