BJP & Congress-i regional party tem ayongtener

New Delhi, May 20 (Agencies): Deobarnü exit poll osangtem ajanga NDA sorkar tanaben arutsü ta ashir aser iba tepelatsü osang nung ajemdaker BJP president Amit Shah-i Mongulbarnü Delhi nung parnok den yaritepba teloktem den senden ka amentsü ayongogo.
Iba senden nung Prime Minister Narendra Modi adentsü imlar aser iba senden mamendang BJP headquarters nung Union Minister tem senden ka amentsü.
Senden nung Bihar Chief Minister Nitish Kumar, Shiv Sena tanishir Uddhav Thackeray aser Lok Janshakti Party tanishir Ram Vilas Paswan nungertem adentsü.
Tamil Nadu Chief Minister K Palaniswami aser O Panneerselvam na dena NDA lennirtem senden nung adentsü. Tamil Nadu BJP president Tamilisai Soundararajan-i ashiba agi sendenji NDA teloktem dang pelar ta ashitsü atema aser tarutsü asoshi jembitsü atema lir.
“NDA lennirtemi elections mapang kanga meranga inyakogo. Prime Minister Narendra Modi menden ser amenba senden nung NDA lennirtem dang pelar ta ashitsü aser tarutsü atema tebilembatem lemsateptsü” ta Soundararajan-i osangbener dang ashi.
Deobarnü exit polls aikati NDA sorkari maneni taruba sorkar akümtsü ta ashir. Züngsem 543 agi akümba Lok Sabha nung parnoki menden 287-365 angutsü ta ashir.
2014 küm Congress-i takok tamajungtiba ngua liasü aser taküm-a parnoki menden 100 teküpok ang angutsü ta exit polls ajanga ashir.
Ano külen, Andhra Pradesh Chief Minister aser TDP lenir Chandrababu Naidu-i May 23 matongdang Opposition party tem longjemtsü asoshi mapa inyakba maneni aser tanü pai Mamata Banerjee den ajurutep.
Naidu aser Mamata nati Congress aser regional party tem teyari agia non-BJP sorkar ka akümtsü atema tebilembatem lemsatep.
“May 23 nü election results adokba sülen telok shingaia sorkar akümtsüsa menden mengutetra, Mahagatbandhan nung party tem tsüngda sorkar akümtsü atema jembiteptsü tanü senden nung lemtet” ta osang ka ajanga ashi.
Taoba anogo ana tsüngda Naidu-i Congress president Rahul Gandhi den anaben tashi ajurutepba den Sonia Gandhi, NCP tanishir Sharad Pawar aser CPI(M) general secretary Sitaram Yechury nunger den-a ajurutepogo.
Iba mapang pai Mayawati aser SP tanishir Akhilesh Yadav na den jembiba osang metetdaktsü.
TDP tanishir Naidu-isa Loktantrik Janata Dal lennir Sharad Yadav aser AAP national convener Arvind Kejriwal na den-a ajurutepogo.
UPA chairperson Sonia Gandhi-ia Congress den yaritepba teloktem aser tanga non-NDA party tem den May 23 nü senden ka amentsü atema osang sangoktsüogo.