Rank Holder tem nem Angh-i tetushi agütsü

Governor aser HSLC topper tem Raj Bhavan nung tangokba yangi angur.

Dimapur, Monupii/May 21 (TYO): HSLC & HSSLC tatidang nung topper tem nem Governor’s awards, MIL & Skill Education subject tem nung subject toppers aser HSLC & HSSLC Examinations 2019 Rank Holders tem nem Angh P.B Acharya-i tetushi agütsüba sentong Raj Bhavan nung May 21 nü agiogo.
Entrepreneurs Association, Kohima CEO Neichute Doulo-i tajungshi o jembiba mapang ashiba agi, lanurtemi parnok tebilemdangba melena tanga alima ka yangertsüla; entrepreneur lima. Mapang melenshiogo aser yamaji shishilembaba tsütsü temelenshi aruogo. Paisa, tanurtem dang parnoki Nagaland ya landlocked State ka ama masü saka land linked State ka ama agizüka shishilembaba tsütsü maongka agia inyaktsü ajungshi.
Linük ka ama India aser state ka ama Nagaland nung entrepreneurs tem nüngdaker anungji parnok ya state atema sen aazüker nübu kaka akümtsüla, ta paisa ashi.
Editor-in-Chief Nagaland Post, Geoffrey Yaden-i kaketshirtem ajungshia, tebilemdangba kaji mapa küma inyaka aotsüla aser parnoki temulung mesüi aser mapa anüngdaka minyaktsüla, kichiyong iba ana ya nisung ajak tsükchir lir aser iba ajanga tejakleni aoba nung teyari magütsütsü, ta ashi. Paisa tanurtem dang, parnok sasa parnok angatettsü asoshi teyari agütsütsüla ta ashi. Linük nung Nagaland nung sorkar mapa inyaker rate timba lir, kechiyong state nung aliba nüburtemi state renloktsü asoshi sorkari dang teyari agütsütettsü ta amanger. Sorkar dak metaloker aliba yimya ya agintsüla aser lanurtem entrepreneur kaka akümtsüla. Yaden-isa, tanurtem dang parnok nükjidong ayuba mapang teti ano tanga sentong ka densema yanglutsüla ta ashiba den nisukaji pei tesayur akümtsüla ta ashi. Nükjidong, taremzük aser tasa asaba ajanga pa len ani ta shia pai iba ajanga parnok nema teyari agütsütsü akok ta ashi. Tatem nung pai parnok dang kati ka ajungshiteptsü aser state ajungkettsü mechi tangar yaritsü asoshi teti bilemtsü ajungshi.
Sentong nungsa School Education Advisor K.T Sukhalu-i kaketshirtem dang tang koda takok tajung angu yamaji maneni takok nguyonga aotsü aser tejakleni aotsü asoshi teti nükla ayutsü ajungshi. Paisa, school managements dang kaketshirtem tim lenmang nung ajungshia anitettsü mepeshi.
Angh P.B Acharya-i o jembiba mapang, state nung unemployment tali akümer aser iba tebilemtsü ya lanurtemi sorkar mapa arishitsü melena entrepreneurship shimba ajanga bentettsü ta ashi. Angh-isa Nagaland nung schools ajak infrastructures renloktsü atema district ajak nung government aser private school tem liromedema renoktsüla ta ashi.
Paisa, kaketshirtem dang meranga inyaktsü aser pei lokti aser state nem teyari agütsütsü ajungshi. Maneni Acharya-i ashiba agi, kaketshirtem state adena orr private sectors nung oa mapa inyaktsü atema skills tasen angazüka renemshitsüla.
Topper ajak nem NBSE award sen 25,000 agütsüba ya Cooperate Social Responsibility kübok SBI Kohima Branch-i sponsor asü.