MBOSE indang taila results sangdongba atema FIR benok

Shillong, May 21 (Agencies): MBOSE result adoktsü atema yongyatepa ataba mapang ka tanü social media nung taila MBOSE SSLC results ka sangdongba ajanga kaketshir den nisungtem ashioktsü.
Taila SSLC result ji http://files.nvshg.org ajanga saya aser parnoki 2018 küm MBOSE indang results sangdong.
Ozüng alema results jelia sangdongogo ta olulu prokshiba sülen kaketshirtem aser school ketdangsertem kanga aoksatepa liasü.
Board ketdangsertemi jungjunga osang jangjatsü bushitepdang mejangjatetba website kati yaküm indang results sangdongba ajanga iba olulu adokba liasü ta bushitet.
“Website jagi yaküm indang results sangdong. Yaküm May 25 nung sangdongba results nung website-i anogo dang melenshir tanü sangdongba onoki ajitet. Parnoki May 25, 2019 ta melenshi” ta MBoSE Joint Director, M. Marbaniang-i ashi.
Onoki Meghalaya Police nung Cyber Crime Cell dang website ji shibangtsütsü atema shidi züluogo, ta MBoSE Joint Director-isa ashi.
“Onokisa police dang iba website ketdang asürtem bushitsü atema mepishiogo. Parnoki Board tenüng menüktsütsü merangba atema sasa bilemer” ta paisa ashi.
Marbaniang-isa ashiba agi police-i Cyber Laws kübok arrla balala nung nisungtem dak tai tongloktsütsü akok.
Tsüraburtem, kaketshirtem aser school ketdangsertemi social media nung olulu prokshiba nung mamangtsüla. Onoki results indang osang tejangja media ajanga sangoktsütsü, ta paisa shisem.
12 Arts aser Class X indang results ji taruba hopta sangdongtsü akok, ta MBoSE joint director-isa metetdaktsü.