Arunachal Pradesh nung polling telok amak; EVMs raksatsü

Itanagar, May 21 (Agencies): Deobarnü Arunachal Pradesh kübok Kurung Kumey district nung nisung 500 shi ka tejak meibanger polling telok ka amak aser EVMs raksatsü.
Iba telok ya Nampe-i aodang lendongji ajuru. Tanü Nampe nung re-poll asütsüba liasü.
Nisung telokji National People’s Party (NPP) züngsemtem lir aser parnoki polling team amakba den EVMs raksatsü ta osang ajanga ashir.
NPP ya Bharatiya Janata Party (BJP) den yariteper telok ka lir.
Polling telok nung CPRF aser Indian Reserve Battalion section ana dena liasü, ta osang ajanga ashir.
Nisung 500 dak temaji tejak meibanger liasü aser parnoki süng aser AK-47 rifles dena prangpong balala amer Langbang anasa polling telokji amak. Parnoki EVMs aser tanga election dak sendakba osettem rakzük.
Iba tatalokba atema Nampe sector magistrate Rido Tarak-i Koloriang police station nung FIR ka benokogo.
“Nisungtemi nikongtsütsü 5:00 ako meta onok telok amak. Idangji parnoki injang aika khatok aser prangpongtem rongnung AK-47 assault rifles dena liasü” ta Rido Tarak-i FIR nung shia lir.
Polling telok nung aliba paramilitary force-i nisung taküm lalutsü tsübuba agi meyiper injang mekhaloktsü, ta paisa ashi.
CRPF platoon ka aser IRBn section anati Nampe polling station-i bener aoba polling osettem meina ao. Ozüng alema inyaker onsara asüba agi parnoki EVMs ji agütsü, ta Koloriang nung police ketdangser kati ashi.
Polling telokji Langbang nungi Koloriang-i aruogo, ta Kurung Kumey district election officer-ia metetdaktsü.
Nampe ya Kurung Kumey district kübok Koloriang Assembly constituency nung dena lir.