Tetsü aser tebu temeim sempet

Alima nung nisungtemi apiteta amongba anogotem rongnung tetsü temeim aser ano tebu temeim anogo amongba ya asütsü. Iba anogo ya nisung shia asoshi pei tsüraburtem dang kanga pelar ta ashitsüba anogo lir. Atangji, tsürabur o tanurtem na külemi ki ka nung alir saka anogo shiabo tanurtemi tsüraburtem dang temeim mesayutetter. Aji oda, temulung nungbo bilemer saka kanga pelar ta ka meshitet aliba ashitsüba maongka anguba anogoji tetsü temeim aser tebu temeim anogo ya asütsü. Ano, tanga tamangba yimsü amangertem dang nungibo asenok asoshi tajungba kaji, asenokbo temeshi amongnü tenla kidang sentong kenyongi balaka tajung yanglua amonger. Iba sentong nung tanurtemi sangru tajung mejema züngtsür, ken tajung tenloktsür aser o jembir tajungi Tsüngrem temeim den atishitepa tsüraburtem temeim indang jembir. Item jagi nisung shia pei tsürabur temeim jangjashir aser menungradaktsür. Ano tajung kaji, arogo nungerbo arogo nunger saka sentepi marurtem aika tetsü temeim aser tebu temeim sentep nungbo arur. Kenü arogo ka nung tebu temeim sentep sentong nung sentepi aotsü mejangrar tebu ka tebu temeim anogo asüba agi sentepi ao. Iba sentep sentong nung par jala jagi sangru ka azüng. Iba sangru nungji tebui la meimba indang zünga angashir, tebu tenük nungi nüktzü alu aser temulung meyip, kechiyong tebui par jalai yamaji pa sanga azüngtsüsa kecha inyaka mali asü. Ano, kenü arogo ka nung tetsü temeim sentep nung arogo nungertemi lanurtem ajanga tetsütem nem tetsü temeim anogo tenüng nung sempet tilala kaka agütsütsü lemtet. Iba sempetji anüshi liasü. Iba anogo nung lanurtemi tetsütem nem anüshiji kaka agütsüyonga arudang, lanurtem rongnungji jala kati indangindanga pei tetsü nem sempetji agütsütsüsa ajurushi. Kodang pei jala ket nungi tetsüi arogoi agütsüba sempetji agizük, tetsüji memeteti ola adoka jepa adok, kechiyong ibaji lai la jala asoshi malitsütetba oset ka liasü. Iba amaji asenok rongnung tsürabur temeim bilemteta pelaba sayutsü merangdang, memeteti aser meteta tsüraburtem mulungjang aika nung kongshir. Iba amaji tetsü temeim aser tebu temeim sentep nung temoatsü anguba ajanga temulung meyiper arogo nung jangrabangraa shilem agir aser tenla tajung agütsür akümba otsü aika lir. Asenok arogo nungertem ya balaka Deobar shi saru lir aser iba denji ano saru balala sarupet sarur, ajisüaka arogo züngsemtem nem meyipa agütsübabo kecha maka. Atangji, arogo nungertemi arogo nungi sarasadem aser Tsüngrem o tajung angutsüba dak alaka meyipa angutsübo kecha meimlar. Ibayongji, karibo kechiba lalushiponga Christmas nung chiyongtsü ayongzüker, kechiba tetsü aser tebu temeim sentep nung sempet agütsütsü ta bilemtsü. Ibayongji, item tangatetbatemji lemsateptsü atema taoba hopta nung yangi iba osangkaket nung ” Ojalatem aser Obalatem anogo nung ya küm shia arogo shiai parnok shia nem sempet agütsü nunga koma süla ?” ta asüba nung bilemdangogo. Atangji, telangzüba magütsüaka tazünger aikati pei mulung nungbo bilema kar denbo pei angatetba nung shisalemsateper asütsü imlar. Telangzürtemia iba ama anogo nung tsüraburtem peladakja sempet agütsü nung jungla ta shidangogo. Atangji, arogo kar nungbo küm shia tsürabur temeim bilemteta sempet kakabosa agütsür saka aika nung magütsür. Ashiko, ibaji senotsü meindoknüba agi asütsü. Ajisüaka, tetsü temeim aser tebu temeim nung sempet atema sen endokbajibo teindoker masü saka ali tajung nung metsü proker amai bilemdi. Iba jagi arogo nung asentenshi adoktsü aser tenlaa teimba arutsü. Kokra, arogoi sempet denji külemi pelaba aser imlaba o tajung shia shidi kaka zülur tetsü shia aser tebu shia nem agütsü nungbo, iba jagi tsürabur aika sentepi arutsü aser tenla agütsütsü tejangraba kümla. Takar asütsüa akok saka iba ama tongtibang anogo nung anguba osetjibo nüngo oset amai akümer aser sensaker asoshibo kanga nüngdakba oset ka, kanga tongtibang anogo nung Tsüngremi agütsüba temoatsü akümer.