Linük meyimba nepurtem

–  Zulu Longkumer.

Meimchirtem dak pei linük meimba shisatsü ka lir aser iba dangji English agi patriotism ta ajar ta asenok ajaki meteta lir. Iba ya ajanga kin ka aser linük ka temaba jenjangi ajungketer aser tejakleni aoer aser tsükchir nungi kümzüka ayur. Linük meyimbaji tongpang nung meranga aser aiben taküm agi tenla-a raraba dangbo masü saka ajem alua ochi shia pei mapa meranga inyakba nungi aiben sayur. Linuk meyimtsü asoshi society aika nung tesayuba ya par sobaliba aser libaliro nung tera yanga develope süa toker talila ka sayutsü kecha menüngdaker aser yimya agi itemji society taintem alir, society kar nungbo ano iba ya tsüraburi kibong nung tanurtem tila asüdang nungi sayua tenzüker, western countries rong nung America nung iba ya kanga akanga lir, parnoki par nisan aser national anthem kanga reta akum tsübotsü sayur aser school colleges aser office ajunga nung par flag ka bosa ayur, aser parnoki par constitution nung koba “meimchir ajak Tsüngremi kasa jenjang nung yanglu aser kasa nüchiso akatsü teim” ta zülua lir ibaji kanga reta amiter aser iba ya joko America nunger asoshi unofficial Motto ka ama mesüra par teinyaktsü Agenda ka ama kümadok aser nüchiso ( freedom) milenji parnoki bener alima ajaklen sangwadaktsütsüla ta parnoki amanger, anungji parnoki par linükji khenbusa tenzüktsüla ta angateta lanur aikati pei tazüngtsü ka züngtemer sülen sepoy nung mesüra linük tenzükba maparen balala nung küm ishikabo tenzüker sülen dang pei jangraba maparen inyaker.
Iba tangatetba dak ajemdaker koba linük nungsa nüburtem lenirtemi tim masüba temzüng ozüng tesashi agi alener aser ochi, temeim aser taochi makai yimsüsüba kübok ayur itemji anema parnoki nokdaker aser par lima dak tashi tulu keta ali nung parnoki itemji salatsütsü lenmang aisü nungi inyaker aser khen khenbo military tashi amshitsüsa akümer, iba amala mapang ajak nung parnoki tasü ita par lima tenzüker aser aikati taküm agi tenla-a nokdaker, aser idangji timtema aliba linük aser nüburtem aika tia tamajungba nungi kümzüka ayur. Iba ama tangatetba akar lanur ka tenüng agi Patrick Daniel Tillman ta ser San Jose yimti, California state nung 1976 nung asoba asayar tajung ka liasü. Pa ya asayaba nung kanga ajungba agi Arizona State University-i scholarship agüja azüng aser pai tangar-i yimlaba dang nungi kanga tajungba asaya meso aser idangji pa kanga nüngtugo aküm aser tazüngba nunga ano tangar dang tajungba züngtet aser award aika agizük, item rong nung tongtibangji — Clyde B Smith Academic award 1996 aser1997, The Sporting News Honda Scholar – Athlete of the year 1997, 1998 Sun Angel Student Athlete of the year Award item ya liasü, iba dak alaka ano tanga award aika pai agizük .
American football ya asenoki asayaba football koba dang soccer ta ajar iba ya masü saka Rugby game mesüka lir aser yangi asayartemji sen kanga ai-e agüja hire asür, anungji kodang pa club ka tenüng agi “Arizona Cardinals” ta sür ka nung dener asaya, parnoki pa nem salary küm nung US Dollar 512000 ( Rupees= 36003840- current exchange rate ) agütsü aser iba den tanga allowances aser perks aika tensema liasü. Pai iba club den asayatsü contract zülutepba term temer külen ano club jagi küm asem atema sen Dollar million 3.6 agatsüdi maneni asayang ta mepishi saka pai magizük .Ya kechiba süra 2001 September 11 nung Osama Bin Laden-i New York nung World Trade Center raksatsü aser iba jagi pa mulung nung kongshi aser kodang America-i apusoa oa Afghanistan amak pai par linük tenzüktsü mulungteta sepoy nung join asü. Kanga nüngtugu nisung ka asünung nisungtemi “kechiba pai iba ama konang nüngsang rongsen aser tetushi jenti aliba career ka toktsür ita sen tila anguba aser timtema lendong nung dang aliba sepoy taküm ka asütsü mulungteter ta asüngdanga liasü, idangji pai “sports asayaba nung ya ni aginüba yimya aser quality tajung aika lir ta bilema arugo saka küm ishika, aser talisa New York nung Twin Towers raksatsür külen iba tensa nung ni bilemba ya kecha jenjang mali amai latak lataka kümogo anungji ni kü linük tenzüktsü asoshi apusoa aoer” ta pai ashi. Pa sepoy training temer Afghanistan-i mezüng ao yangji khenpika tenzüka ali aser ano Iraq-i yok aser yangji tatsüka lir Afghanistan-i meyipa ao, iba tepiyong pai kanga meranga aser tasü ita inyak ta ashir. Tatem nung pa medemertem Taliban-i amakdang aji kümzüki aodang khaseta asü. Pa temang America-i bener arudang aser funeral aser memorial service agiba ajak TV nung yoka aser News paper aser Mass Media ajunga nung sangdonga linük nung lenir Politician tajung ka asüba dang nungibo tetushi tuluba agüja liasü ta ashir. Iba nisung ya Tsüngrem dak amangba nisung ka masü saka pa kanga ochi aser linük meimba shisatsü den tasü tait aser tangatetba tulu aliba nisung ka liasü aser pa asü dang arishi küm 27 dang liasü. Iba ya ajanga par nüburtem temulung majem saka temulungtetba tuluba aser tasü taitba dang aküm ta ashir. Iba amala tasü tait aser linük meimba shisatsü aliba nübur ajangadang linük nung temelenshi bener aruteter aser alimaji tsükchir nungi kümzüka yuteter.

(Maneni taruba adok nung…)