BJP-i aniba NDA-i menden 353 nung takok nguogo

New Delhi, May 23 (Agencies): Lok Sabha elections exit poll ajanga asadangtetba ama aser BJP-i jembia aruba ama tanü Ato kilonser, Narendra Modi aser BJP Tir, Amit Shah na leniba nung BJP leniba nung NDA teloktepi takok tulu nguogo.
Congress dak alaka tanga party shingia kümsük ana atonga Lok Sabha election nung takok mangui aruogo aser tang ang mezüng BJP-i aniba NDA-i kümsük anaben atonga sorkar akümtsü.
Tan Lok Sabha election nung BJP-i UP, Rajasthan, Haryana, Madhya Pradesh, Bihar, Himachal, Uttarakhand, Maharashtra, Jharkhand, Chhattisgarh, Delhi aser Karnataka state tem nung kanga junga takok nguteta menden 300 dak temai takok angu.
NDA-i menden 353 nung takok angu: BJP-i menden 303, Shiv SAena-i menden 18 aser JDU-i menden 16 nung takok angu. UPA-i menden 91 nung takok angu: Congress-i menden 51, DMK-i menden 23 aser NCP-i menden 5 nung takok angu.
2014 küm Lok Sabha election nung NDA-i menden 354 nung takok ngua liasü aser UPA-i menden 66 nung takok ngua liasü.
Taonung New Delhi nung aliba BJP headquarters nung lenirtem aser party nung inyakertem den jembidang Ato kilonser, Modi-i, “1984 küm BJP-i menden ana nung dang takok angu. Tangbo asenoki kümsük anaben tashi takok angur. Iba ya Modi takok masü saka nüburtem teimla aser taginüba indang takok lir,” ta ashi.
“Nenoki tongmelang nisung ka nem temoatsü agütsüogo. Tarutsü anogotem nung tamajung tebilemba agi kecha meinyaktsü. Ni aibelena inyaktsüsa akok saka yirutsütsüsa meinyaktsü,” ta Ato kilonseri metetdaktsü.
“Tarutsü anogotem nung kü taküm nung minute shiaji linük aser nüburtem atema inyaktsü. Asen linük temzüng ya atematiba, asenoki temzüng nung aliba ajak benshitsüla,” ta pai metetdaktsü.
“Nüburtemi tamang taliba kateter, yamaji sorkar khuret-a tuluba akümer. Asenoki tejaklen repranger opposition dena ajak longjemer inyaktsü,” ta pai ashi.
“Tanü Parliament nung shimba züngsem ajak nem ni tenüngsang agütsür aser asen linük tejakleni anitsü atema ajaki inyaktsü, ta ni imlar,” ta paisa metetdaktsü.
Rahul Gandhi-i Modi nem tenüngsang agütsü
Tanü Congress Tir, Rahul Gandhi-i Lok Sabha election nung takok anguba atema Ato kilonser, Modi nem tenüngsang agütsü.
Rahuli-i, “India nüburtemi Narendra Modi ano ASto kilonser inyaktsü telemtetba agiogo aser ni ibaji akhümtsüur,” ta metetdaktsü.
Rahul-isa, “Lok Sabha elections ya tangatetba ana tsüngda rara ka liasü aser ozü party-i maneni BJP tangatetba anema raratsü,” ta metetdaktsü.
Rahul-i menden ana nungi tokatep; Amethi menden nung BJP lenir, Smriti Irani matsüngdang tamakok angu aser Wayanad Lok Sabha menden nungbo vote tali 4,28,613 agi takok nguogo.