Plastic melen kechi amshitsü ?

Joko yimya jungjunga sübar asünung, dokan nung kechisarina alir, itemji polythene agi yangluba juli nung meinokra tabendak maka amai kümadoker. Ano, lokti senden nung plastic agi yangluba tzü bottle alia melemtsüra nisung shia nem tzü tajemtsü agütsütsübaji tamakoktsü mapa ka amato bilemer. Asenoki bilemdangra, asen limai tanü dokan nung amshiba polythene bag marudang, dokan purtemi kaket nung aleper agütsü aser itemji asenok juli nung enoka bener aru. Tzü tajemtsü bottle nung enoker mayokdanga, lokti senden nung dena tzü aser süngo tajemtsüji chipo nung yur auo marok mesüra tzümar marok nung jema aru. Ajisüaka, alima nung nisungtemi nisungtem nüngdak reprangteta purapiteta aodang, nisungtem anisüngzüktsü asoshi polythene bag yanglutet aser tzü tajemtsüa tzü bottle nung enoker ayoktsü tenzük. Iba amaji tzü bottle nung enoker ayok metenzükdangbo, asenok shingaia tzü alia ajemtsü tashibo mebilem. Tanübo joko asenok ajak asoshi dokani aodang oset abentsü juli kecha bener maoyonga dokan purtemi polythene bag nung seper agütsür asünungji, asenok asoshi ayongra kümogo aser lokti tulu adenshiaka tzü bottle tila nung enoker ayoker asünungji, sen tera aoyonga ayongayonga anganüa agütsütetter. Item ajakji alima nung nisungtem shisarenloka aodang temelenshi tajung bener arubatem lir. Ajisüaka, temelenshi tajung aru shia nung asenoki mebilemdangi inyakra, item jagi tarutsü nung asenok timtem ajurutsüsa ataloker. Aji oda, tanüa asenoki dokan nung aguba polythene bag aser plastic tzü bottle-tem amshir mashimashi endokba ajanga alima nung asenok taküm melitettsüsa ataloktsü ana nung lir ta scientist-temi asenok kümdangshidaktsür. Süng aser kakettem agi yangluba osettembo mashimashi nung endokyonga parnokji melamelaa ali küma aoer, anungji iba jagi alima mekangshir. Ajisüaka, plastic yabo amshir asenoki ali aser tzü nung endokba ya shizüka moi küm noklang pongobo alir. Kodang asenoki aji bilemdangdir, asenoki tanü dokan nungi bener arur endokba polythene bag aser tzü bottle-tem ya ali aser tzü telong nung shizüka moi küm noklang pongo alitsü. Idangjibo plastic jagi alima aser tzüyim asüngtsü. Iba jagi alima telonglen nungi süngdong meia atutsü makoktsü aser tzüyim nung tzü shiruru kata taküm melitettsü. Iba jagi alima tatsükba akümtsü aser alima nung taküm alitsü tasak asütsü. Atangji, nisungtem maliyonga alimabo litettsü saka alima samara nisungtembo talidak makatsü. Ibaji kodang asenok ajaki angatetdir, shingaia asenok dang mashiyonga asenoki alima kanga meimtsü aser alima mesamai kümzüka ayutsü atema pei akok mapa tilakabosa inyak tenzüktsü. Alima mesamadaktsüi kümzüktsü atema asenoki makoktsüsa mapa tuluka inyaktsüba masü saka asenok nisung shiai aseni akok mapa tilala maneni inyakra, iba jagi alima kümzüktsü. Atangji, asenoki alima kümzüktsüsa meinyakaka alimabo mesamatsüa akok saka alima kanga tsüka akümba agi asenok tali majung kümra, alima mesamayonga asenokbo samatsü. Iba shisabolu jagi asenok mulung anisüngzüka melii tang amai tarutsü nunga alima nung nisungtem anisüngzüka alitsüsa asenoki inyakteta yutsütsüla. Alima kümzüktsü indang jembiba ya jungjunga bilemdangra, alima masü asenok kümzüktsü indang jembir, anungji asenoki asenoksasa tang aser tarutsü putu nung alitsü purtem kümzüka alitsüsa kanga nendaka inyaktsü tim. Asenok ajaki alima kümzüktsü atema inyaktettsüba mapa kaji akok tashi polythene bag mamshitsü aser amshiyonga mashi nung meindoktsü aser ano akok tashi tzü bottle alia majemtsü. Atangji, alima nung tebilemtsü aru shia shisa akar atemabo temoatsüa dena lir. Annngji, tang amai polythene bag mamshitsü ajungshitepdang, jet ta polythene bag melen amshitsüsa asenoki kaket agi mesüra yong aser anem sü agi juli yanglutsü bilemdangtsüla. Iba amaji plastic tzü bottle mamshitsü ajungshiteper süra tajemtsü tzüjia kaket pongdang nung enoker ayoktsüsa aser chiyongtsüa süngo tu agi yangluba auso nung chiyongtsüsa lanurtemi shisadanga inyaktsüla. Iba amaji asenoki inyaktetra, alima nung plastic mamshi anenbaji asenok atemabo temoatsü asütsü.