PS Golay-i Sikkim CM inyaktsü tezüngzüktep agi

Gangtok, May 27 (Agencies): Arishi küm 51 tain Prem Singh Tamang-i elections nung tokteptsü atema temelaba magütsüaka, Hombarnü pai Sikkim nung Chief Minister trokbuba inyaktsü atema tezüngzüktep agiogo.
Golay ya Sikkim Krantikari Morcha (SKM) president lir aser state assembly election nung metoktep. Honibarnü pa legislature party leader inyaktsü shim.
SKM president Golay ya Animal Husbandry minister inyakdang miimmechi inyakba ken o ka nung tai tongloktsü aser pa ita 12 tashi tepuokdak ayu. August 10, 2018 nü pa mapang tembangba sülen tepuokdak nungi chioka liasü.
Prevention of Corruption Act kübok aitsüba nisung kati pa tepuokdak nungi chiokba sülen küm 6 tashi election nung tokteptsü makok ta Representation of People’s Act nung Arrla 8 nung lateta lir. Iba ozüng ajanga Golay-i August 9, 2024 tashi elections nung tokteptsü makok.
Ajisüaka, Sikkim Governor Ganga Prasad-i item tenokdangbatem liaka, Hombarnü Gangtok nung aliba Paljor Stadium nung Golay aser council of ministers 11 nem tezüngzüktep agidaktsü.
Golay aser tang SKM minister temi Nepali oshi tezüngzüktep agi aser iba sentong nung SKM züngsem noklang aika aden.
SKM ya 2013 küm tentetba telok lir. Taküm assembly election nung parnoki menden 32 agi akümba Sikkim Legislative Assembly nung menden 17 nung takok angu.
Taoba Chief Minister Pawan Chamling-i aniba Sikkim Democratic Front (SDF)-i tesüiba küm 24 tashi sorkar yimsü süa aru.
Tanü iba sentong nung Pawan Kumar Chamling aser SDF lennir tejentem shinga maden.