PM Modi-i tezüngzüktep agiba sentong nung BIMSTEC lennirtem adentsü

New Delhi, May 27 (Agencies): Brihostibarnü Prime Minister Narendra Modi-i Rashtrapati Bhavan nung tezüngzüktep agiba sentong nung BIMSTEC (Bay of Bengal Initiative for Multi-Sectoral Technical and Economic Cooperation) lennirtem adentsü jaoktsü.
BIMSTEC telok nung Bay of Bengal tesem nung aliba linüktem- Bangladesh, Myanmar, Sri Lanka, Thailand, Nepal aser Bhutan dena lir. BIMSTEC ya South aser Southeast Asia tsüngda apu ka ama inyaksangshir.
“India sorkari BIMSTEC Member States nungi lennirtem tezüngzüktep agiba sentong nung adentsü jaokogo. Iba ya sorkar indang ‘Neighbourhood First’ policy nung ajemdaker inyaker” ta Ministry of External Affairs Spokesperson Raveesh Kumar-i ashi.
Kyrgyz Republic (Shanghai Cooperation Organisation mendenbuba) aser Mauritius (Pravasi Bhartiya Divas nung tongti tesemdanger) nungi lennirtema iba sentong nung adentsü jaokogo.
Bangladesh Prime Minister Sheikh Hasina-i tang agi tanaben atema Modi-i Prime Minister inyaktsü tezüngzüktep agiba sentong nung medentettsü, kechiyong la tang linük asem semdangi oa lir. Bangladesh sorkar tenüng nung Liberation War Affairs Minister AKM Mozammel Huq adentsü, ta osang ajanga ashi.
Tanü tashi nungbo Pakistan Prime Minister Imran Khan sentong nung adentsü jaokba osang kecha mali.
Tamil cinema nung nüngtugu actor tem- Rajinikanth aser Kamal Haasan naprong iba sentong nung adentsü jaoka lir. Telangana Chief Minister K Chandrasekhar Rao aser Andhra Pradesh CM inyaktsü alisang YS Jagan Mohan Reddy naprong sentong nung adentsü imlar.
2014 küm PM Modi-i SAARC lennir ajak jaoka liasü. Iba mapang Pakistan Prime Minister Nawaz Sharif aser Sri Lanka President Mahinda Rajapaksa naprong jaok.
2014 küm tezüngzüktep agiba sentongji Rashtrapati Bhavan kima nung agi aser nisung 2,000 shi ka aden.
“Rashtrapati Bhavan nung May 30, 2019 aonung 7:00 ako nung President Ram Nath Kovind-i Prime Minister aser Union council of ministers züngsemtem tezüngzüktep agidaktsütsü” ta Deobarnü sangdong ka nung metetdaktsü.
Züngsem 543 agi akümba Lok Sabha nung NDA MP 353 lir aser parnok nungi BJP MP 303 lir.
Iba sentong nung BJP lennirtem den NDA nung dena alirtem- SAD lennir Prakash Singh Badal, JD(U) tanishir Nitish Kumar, LJP tanishir Ram Vilas Paswan, Shiv Sena tanishir Uddhav Thackeray, AIADMK lennir K Palaniswami aser NPP tanishir Conrad Sangma nungertem adentsü imlar.