Ashok Gehlot, Sachin Pilot aser Priyanka nungeri Rahul ajuru

New Delhi, May 28 (Agencies): Tawa Congress-i Lok Sabha election nung tamakok mejungi anguba nung ajemdaker Congress Tir Rahul Gandhi-i Tir menden nungi sodi meshiba mapang ka nung Mongolbar lenir aikati pa semdangogo.
Tanü Rahul aianu, Priyanka Gandhi Vadra, Rajasthan nungi Congress lenir- Chief Minister, Ashok Gehlot aser Deputy CM, Sachin Pilot nungeria pa ajurua liasü.
Rajasthan deputy chief minister Pilot-i Rahul Gandhi’er kidangi oa pa ajuru, iba sülen chief minister Gehlot-ia pa ajurua liasü.
O lemtepba mapang nung Congress general secretary Priyanka Gandhi-a densema liasü, ta party osang ka ajanga metetdaktsü.
Congress party otongdar tongti, Randeep Surjewala aser general secretary K C Venugopal natia Rahul’er ki semdanga pa ajuruogo, ajisüaka item senden nung kechisa jembiar mejangjar.
Honibar nungi tenzüka Congress lenir tain aikati Rahul Gandhi dang pai sodi meshiba shidiji meyipa agitsü mepishi, ajisüaka pai sodi meshitsü atema lemtetba nungi matsüngshir.
Lok Sabha election nung party-i tamakok ngur lia Karnataka aser Rajasthan na nunga Congress sorkar chireptsüsa tensa ka nung lir.
Rajasthan nung Congress sorkar liaka BJP-i aniba NDA-i Lok Sabha menden 25 prongla nung takok ngua liasü. Karnataka nungi Congress densema aliba sorkar liaka Congress-i Lok Sabha menden 28 nungi menden 1 nung dang takok angu.
Tawa Lok Sabha election nung party-i tamakok anguba nung ajemdaker state balala nungi Congress Tirtemia pei menden nungi sodi meshiba shidi agütsüogo.