Pema Khandu-i tanü tezüngzüktep agitsü

Guwahati, May 27 (Agencies): Arunachal Pradesh Chief Minister Pema Khandu-i Bodbarnü tezüngzüktep agitsü.
Taküm Assembly aser Lok Sabha elections nung BJP-i takok tulu angu.
Hombarnü Arunachal Pradesh nung BJP legislature party-i parnok lennir asütsü atema Khandu shim. Iba sülen Khandu den külemi taoba Deputy Chief Minister Chowna Mein aser state BJP president & MP Tapir Gao nungertemi Governor Brig. B.D. Mishra den ajurutepa sorkar akümtsü kuli agütsü.
Arunachal Pradesh Legislative Assembly nung BJP MLA 41 lir aser parnok 40-i pa lennir asütsü shim, ta Khandu-i Governor dang ashi.
Constitution nung Arrla 164 (1) nung ajemdaker Governor Mishra-i Khandu Arunachal Pradesh nung Chief Minister inyaktsü shim aser Bodbarnü sorkar akümtsü aser tezüngzüktep agitsü jaok.
Iba sentongji Itanagar nung aliba Dorjee Khandu State Convention Centre nung agitsü.
Arunachal Pradesh nung taoba ita State Assembly aser Lok Sabha elections külemi agi aser May 23 nü votes azüng.
Züngsem 60 agi akümba assembly nung BJP-i menden 41 nung takok angu.