PM Modi-i Pranab Mukherjee ajuru

New Delhi, May 28 (Agencies): Lok Sabha election nung takok tulu anguba sülen Mongolbarnü Ato kilonser, Narendra Modi-i temoatsü meshitsü atema taoba mapang linük Tir aser Congress lenir, Pranab Mukherjee ajuru.
Brihostibarnü Modi-i tang agi tanabenbuba Ato kilonser inyaktsü atema tezüngzüktep agitsü.
Tanü Modi-i taoba Tir, Pranab tenüngsanga, pa ya yimtenren lenir ka lir, ta ashi.
Tesülen Modi-i twitter ajanga, “Pranab ajuruba shia shisa tasen aika angur. Pa shisatsü aser tangatetabaji medemdangtsü makok. Pa ya yimtenren nisung ka lir, shibai asen linük atema mapa tajung aika inyakogo. Tanü pa ajurua pa dang temoatsü meshiogo,” ta metetdaktsü.
Modi-isa Mukherjee den tangokba noksa ka lemsatep. Noksa nungji taoba Tiri pa nem tenüngsang agüja nanglong nemtsür.
Pranab-i Modi dang Ato kilonser kümsük tanabuba inyakdang takok ngua inyaktsü moatsü. Pranab-i twitter ajanga, “Nü o tajung asoshi pelar PM @narendramodi. Na ajuruba atema pelar. Tang agi kümsük anabuba inyakdang nü mangdang ‘Sabka Saath Sabka vikas aur sabka vishwas’, ataloktsü ni sarasademtsür,” ta metetdaktsü.
May 23 nü election osang sangdonga BJP-i menden 303 nung takok anguba sülen-a Pranab-i twitter ajanga, “Takok tulu anguba atema tenüngsang agütsür PM @narendramodi. India nunger nisung billion 1.3 teimlaji nü dak lir. Tsüngremi nü nem tashi agüjangma,” ta lemsatepa liasü.