Jerusalem, September 16 (Agencies): Israel Ato Kilonser, Benjamin Netanyahu-i taruba hopta Moscow semdanga Russia Tir, Vladimir Putin den ajurutepa senden ka amentsü sentong renemba osang ka Netanyahu’er office-i tanü Bodbar nü metetdaktsüogo.
“Ozü lenisang, Netanyahu-i Moscow taruba hopta tonga aoba sülen Russia-i par tongpang nung amshitsü osettsüset aser mitkartem Syria-i yokba aser yamaji inyakba ajanga ozü Israel nem tensa tamajung bener arutsütsü den sentakba onük Putin den benoka jembitsü,” ta office-i metetdaktsü.
Russia-i par mitkar aser tongpang nung amshitsü osettsüset Syria-i tsüngdong yokba den külemi, Hezbollah densema kiralongrar telok balala nem tongpang nung amshitsü osettsüset agüja yariba osang bushiteta lir.
Russia-i yamaji inyaktsü tenzükba ajanga par Israel nem lendong bener aruja par linük nung tensa mejungi kümdaktsütsü ta Israel-i tebilemtsü khuret benoka lir.
Ano külen, Israel-i Syria Tir, Bashar al-Assad-i aniba Syria sorkar anemer saka kidangsüa aliba Syria linük nung adokba mangatettep ken o nung par teka amoka mali.
Ano, Iran-i alima tashi abenba linüktem den nuclear tezüngzüktep taküm July ita agiba sülen par linük anema benoka tenokdangba sentongtem agienba ajanga rongsenren jenjang tajungba akümba Iran-i Hezbollah densema kiralongrar aser telungpur telok balala yaritsü tenzüka par Middle East nung tensa mejungi kümdaktsütsü ta Israel-i tebilemtsü khuret benoka lir.
2006 nung Israel den tongpang kanga sashia raraba aser Lebanon nung tentetba Hezbollah telok ya Assad pusemba tongti telok ka lir.
Ano külen, Russia-i Syria sorkar nem mitkar teyari maneni agütsütsü tenangzükba olen ka Putin-ia tanü metetdaktsüba osang jangjaogo.
You must be logged in to post a comment Login