LS election tembangba sülen totzü jenjang tupet tudar

New Delhi, May 28 (Agencies): Lok Sabha election tembangba sülen nungi petrol aser diesel jenjang tupet tudar; tesüiba anogo 9 tsüngda totzü litre nung poisa 70-80 shi tuogo.
Lok Sabha election tatembangbuba shilem May 19 nü agia liasü aser anogo ka dang lir May 20 nungibo totzü jenjang tupet atur.
Tesüiba anogo 9 tsüngda petrol totzü litre nung poisa 83 aser diesel litre nung poisa 73 tuogo, ta linük meyong totzü company temi metetdaktsü.
International market nung totzü jenjang tuaka India nungbo April-May ita nung totzü jenjang metui liasü.
Tanü Mongolbarnüa petrol litre ka nung poisa 11 aser diesel litre nung poisa 5 tuogo.
Tang Delhi nung petrol litre ka nung sen 71.86 lir aser diesel litre ka nung sen 66.69 kümogo.
Ano Mumbai yimti nungbo petrol litre ka nung sen 77.47 aser diesel litre ka nung sen 69.88 agi ayoker.
Linük meyong totzü retailers- Indian Oil Corp (IOC), Bharat Petroleum Corp Ltd (BPCL) aser Hindustan Petroleum Corp Ltd (HPCL) temi election mapang nung totzü jenjang metui liasü, ibayongji tang ibaji küpzüka totzü jenjang atur.
Yaküm May ita nunga Karnataka nung assembly election agidang totzü company temi anogo 19 tashi totzü jenjang metui liasü, ajisüaka election tembangli parnoki anogo 16 tashi totzü jenjang tupet atu.
Iba denji kasa 2017 küm Gujarat assembly election mapang nunga totzü company temi anogo 14 tashi totzü jenjang metui liasü.
2017 küm January nungi April ita tashi nung state pongu-Punjab, Goa, Uttarakhand, Uttar Pradesh aser Manipur nung assembly election agidanga totzü jenjang metui liasü.