Takok junga mangurtem !

Küm shia class 10 nungi shir tekalen tatidang nung nisung aikati takok junga mengutetter. Atangji, parnokji tekolok mechira, azümasen aser sempet tajung kecha mali ta masü saka parnok tangatetba, tejangraba aser nükjidong balala asüba agi tatidang nung takok junga mengutet asütsüa akok. Ajisüaka, asenoki aiben parnokji takidak makatsüba tanurtem amai bilemer aser tatidang nung tematiba jenjang nung takok angurtemjiang nisung akümtsü ama parnoki takok anguba tsütsüji dang temulung agütsür. Tanü asen lima nung loktiliba mejungi akümba aser rongsenren jenjang tamajungba akümbaji asenoki kaketreju nung tematiba takok jenjang angutsüba nung dang rangloker, saka tanüngba kaketshir aser lanurtem asoshi shisalen shitak sayutsüsa sentong meyanglutetba ajanga lir. Atangji, kaketshirtem ajak tekolok techira aser tajung dang asütsü saka tajungtem rongnung tajungtibajibo ishika dang agitettsü. Ajisüaka, asenoki angatettsüba kaji, alima nung loktiliba tajungba küma renlokdaktsüba yabo kaketreju nung kanga junga takok anguba agi masü saka pei dak aketba sempet meteta kaketshisatsü angazükba aser pei mapa nung temulung süsüa nendaka inyakba agidang inyaktetter. Atangji, kanga junga takok ngua azüngertemji aika tulur akümtsüa akok, saka asenoki jungjunga bilemdangra, alima ya tulurtemi renlokdaktsür masü saka aluyimertem, industry lapokertem aser business tapu balala inyakertemiang renlokdaktsür aser item sen agidang tulurtem ita sen angur. Ibaji kodang asenoki angatetdir, kaketreju nung takok tajung angutsüba kisüngji tongtibang masü saka kaketreju nung takok tajung manguyonga,  loktiliba nung nisung shiai nübortem asoshi langka tajung kabosa inyaktetba nisung akümtsübajing tongtibangba lir. Asenoki tanü tashi nung alima nung nisungtem nüngdak osettem purapitetter takümtem reprangdangra, parnok ajakji kaketreju nungbo takok junga manguba purtem asütsü. Tanü alima nung takartiba nisung Bill Gates ya dena  kaketreju nungbo junga graduate mesütetba kaketshir ka lir. Ajisüaka, tanübo pa sen agi alima ajaklen government sen dang nungibo teimba endoka nübortem yarir. Item ama nungji asenoka tebilemdangtsü aser tangazüktsü aika lir. Asen chirnurtemi kaketreju nung takok junga mengutetba atema parnok dak asenok teimla mesamatsü tim. Tanü lima nung ya balaka kaketshirtem ya tazüngba nung kechi jenjang nung takok angu ta masü saka kechi akümer ta asübajiang tongtibangba lir. Tanü asen lima nübortem asoshi nüngdak aika bushiteta agütsütsü atema lanurtem tsüngdang tayongzükba aika anendaka lir. Aji oda, tazüngba nung tematiba jenjang nung takok angutsü bilemba kisüng agi masü saka nia nübortem asoshi kechi inyaktsütettsü ta bilema kaketshisatsü bushibajiang tongtibangba asütsü. Kaketreju nung junga takok mangurtemi asenok asoshi light aser telephone ama nüngdak purapiteta yutsüogo. Iba amaji tanü putu nunga nübortem nüngdakba purapiteta agütsütsübaji kaketshirtem khuret lir. Kaketshisatsü bushiba nükjidong ya tulur kümer ayongayonga ita sen tulu chia kazütsüba masü saka nükenbelema shisa tasen bushitsü aser asentzüsen sena nübortem asoshi nüngdakba mapa kabosa inyaktettsü aser bushitsütettsü ta bilema inyaktsübaji lir. Kaketshisatsü bushiba nung takok jenjangbo tajung angu saka ita sen chia kazüba dak alaka nübortem asoshi nüngdak kecha meinyaktsütetra, pa mesüra la kaketshisatsü bushiba nung anguba takokji amajok asütsü. Iba nüngdakji meteta government-ia kaketreju nung takok junga mangurtem asoshi ano shisa tasen bushia renloktsüsa mapa sayuba, angazükba aser bilemdangba kaketrejutem peria lapoktsüla. Kaketreju ya degree agütsütsü asoshi masü saka kaketshirtem shisatsü tasen-tasen bushiloka shisa tenük lapoka nübortem nüngdak reprangtetba aser agütsütetba tesem asütsü tim. Tanü asen lima nung lanurtem asoshi degree aser certificate kisüng angudak masü saka  shisa tasen poktetdak aser shisa moludak tesem aser rejutem kanga nüngdaker.